Alan梁二 的「半透明人間」“SemiTransparenese” 時代
有人問我究竟乜嘢係「半透明人間」其實我冇一個真實或者肯定嘅答案，我嘅原意只係想創作「影分身」，希望呢個世界有多一個我嘅存在。喺創作上同埋交流上，唔同嘅朋友唔同嘅觀眾令到「半透明人間」加插咗好多嘅層次，好多嘅思想，好多個方向。今日嘅「半透明人間」係一個屬於同我一齊創作，同埋同我一齊欣賞我作品嘅所有人，一個屬於我哋嘅「半透明人間」時代。
有啲朋友話「半透明人間」好似影鬼相，又有啲朋友話「半透明人間」係一個小劇場；有人睇落照片入邊嘅角色Fade out緊，亦有人相反話相片入邊嘅角色準備出現中。一張相片，多重感受，各人有各人嘅觀點與角度，越睇越精彩，有時候真係超越咗我原創者嘅諗法添。
講返「半透明人間」究竟點樣嚟？其實都有幾個出發點。事情起源於2023年夏季尾秋季左右，我啱啱去完星加坡旅行，又啱啱搞完我個人嘅20周年攝影展，有一日約咗Marina同埋Brian去飲嘢，咁啱就係提起不如一齊合作搞一啲新嘅藝術展覽。我就show張喺Singapore多美哥度影咗嘅玻璃屋俾Marina睇，誰不知Marina又咁啱俾一張玻璃屋嘅照片我睇，Marina話佢而家傾緊一個地方諗住搞一個藝術合展。我睇到嗰張玻璃屋嘅相，原來就係我影嗰張相嘅同一個地方，我二話不說就即刻答Marina，如果你真係喺嗰度搞展覽，我一定參加，因為我唔知係咪「神推鬼㧬」想我哋去做一件事。Marina話佢都有同另一個法國嘅artist傾過合展呢一件事，對方都係同我一樣二話不說咁樣應承；我話有我哋兩個墊底，唔係唔去做呀嘛？
我個心入邊諗，2024年要搞呢一個展覽，我一定要好用心咁樣去準備。但究竟我要做幾多張作品呢？ 20張作品夠唔夠時間做呢？都係唔好啦，做住10張先啦。
10張嘅作品，一定要有我個人風格，亦都要有我嘅個人元素，今次我要影啲乜嘢好呢？
由千禧年中期，Kenny Sir教我攝錄攝影，我就好着迷「分身術」同埋慢快門拍攝。以前做分身術，後期嘅話都會用「圖層」俗稱就係Layer mask,又或者用Cropping, cut and paste等等；前期嘅話「用菲林」就用多重曝光，「用數碼機」多重曝光合成，什至簡簡單單用鏡嘅反影。其實2010年之後，我已經開始試緊一啲新嘢，就係「單一曝光·影分身」。
究竟100年前啲人係點樣玩「實驗攝影」㗎啦？如果我將時間斬開，係咪就可以做到兩個我嘅出現啊？如果我影一張1秒嘅相，我每半秒改變位置，係咪就可以斬開時間出現兩個我呢呢？「單一曝光·影分身」就係咁樣開始。經過無數咁多次嘅實驗失敗，失敗，再失敗；後來見到有啲朋友玩閃光燈製造出兩個殘影，我就嘗試用佢哋嘅方法，結果都係失敗，失敗，再失敗。
反覆實驗，反覆嘅時間控制，反覆嘅閃燈光控制，最終都係失敗收場，但係喺有意無意之間我竟然影出咗好多「鬼相」。嗰啲鬼相，當然就唔係鬼啦！因為通通都係我嘅自拍照，全部都影到我自己「半透明」但輪廓非常清晰⋯⋯奇怪啦？我影咗啲乜出嚟啊？咁恐怖，都係唔好搞啦⋯⋯
由2010年一跳就去到2016至2017年間，咁啱嗰陣就有社區中心叫我去教攝影，學生知道我影埋影埋好多長時間曝光嘅作品，之後就叫我教佢哋點樣去影。誰不知，原來我哋學生，學完之後係要去參加展覽，我就覺得唔影啲特別嘅嘢點可以展出啊！我其中一個得意嘅門生佢個名叫做「方子浩」，我就問佢想唔想試吓影「半透明人」，點知我哋影咗出嚟，就為攝影帶嚟咗一丁點迴響。「方子浩」影咗張「半消失嘅佢」嘅黑白相，反映咗人生百態！又上電台做訪問，又上埋報紙，但係可惜我哋兩個最終都冇紅到！
講到呢度，就又要飛返去2023年秋夏，我為咗2024年嘅Singapore展覽仲煩惱緊！要有我個人特色，又要有我個人風格嘅攝影作品，咪就係 「半透明」 又可以「分身」嘅我囉！咁究竟叫咩名好呢？透明人攝影；如果係透明，就睇唔到啦！咁即係一定要用半透明！之前有個漫畫同電影叫做「透明人間」；而我嘅作品就係關於半透明人時間，不如就叫「半透明人間」啦！就係咁「半透明人間」就開始咗啦⋯⋯後來先知道好似係日本一首歌嘅名，但嗰首歌與我無關㗎！我亦都冇抄佢㗎！咁啱㗎咋！
喺我仲諗緊點樣去創作我新嘅攝影作品，Marina就同我講已經簽好咗新加坡展覽場地合約。我同Brian就即刻Yeah Yeah Yeah 啦！誰不知原來得返兩個月左右嘅時間，影10張實驗作品其實真係唔難，難就難在我想加入好多新嘅元素。以前我影嘅「單一曝光·影分身」相片同埋「方子浩」影嘅「半消失嘅佢」都係黑白照片，今次有機會去星加坡展出，我加入啲乜嘢元素好呢？喺嗰陣時，咁啱Kevin Tam搵我試新髮型style，話試吓幫我整個綠色頭，就係咁啟發咗一啲新嘅諗法，我就同Kevin講你幫我整頭，我就用你嚟影實驗相。染頭髮，係要破壞頭髮嘅顏色；如果我影相，之後破壞相片原有嘅顏色，又會係啲咩新搞法呢？就係咁，我哋兩個就合作影同埋製作咗第一張「半透明人間」嘅作品。全新嘅「單一曝光·影分身」相片變成咗「半透明人間」，同以往唔同嘅唔單只係由黑白變成色彩繽紛，再且挑戰30秒之內拍攝三個影分身對象，再挑戰拍攝9個唔同嘅人9個唔同嘅故事。由原定嘅10個作品減至九個新作品，因為九張相好似九宮格咁隨時分拆合併唔同嘅排位可以有好多變化。
好多謝9個唔同嘅朋友，同我一齊癲一齊創作「半透明人間」呢一個系列。每個人都嘗試放一啲自己嘅元素喺「半透明人間」入邊，增強咗除咗拍攝嘅難度之外，仲加強咗照片背後嘅故事性同埋原創性。排名不分先後「髮型設計”Kevin Tam”、DJ Nat King (巨人）、香港跳高運動員”Tiffany Tang”、飲食評論員”Zacky 石兒”、女權主義者”Ritsu”、音樂人”Russell”、我的學生”鬼鬼”、乜乜女孩”Joanne” 同埋 愛群理髮店 嘅 店主 “阿Mark”」
除咗拍攝之外，其實打印同埋包裝運送，整個創作團隊都花咗好多唔同嘅心機。首先要多謝照相館嘅Tommy哥哥同埋昌哥，為咗我嘅展出試咗好多種唔同嘅紙質打印，最後就搵到我最喜歡嘅紙質，就係Metallic Gloss Paper，一種好適合呈現「半透明人間」嘅紙張物料！之後亦都要感謝Cathy仔包裝同埋裝嵌每一張嘅攝影作品，確保每一張作品都係安全嘅情況之下運到海外。
終於完成咗九張「半透明人間」作品帶到去星加坡參與 “Connecting Colors Arts Exhibition” Curated by Brandstorm Communications Visual Arts Centre, Singapore嘅展出。原先只不過係為咗完成海外展出嘅一個心願，真係冇諗過，好多嘅觀眾俾咗我好多支持同埋鼓勵性嘅說話。大家都睇到，非多重曝光 同埋 非數碼合成 加上色彩破壞，原來可以影出咁靚嘅相，佢哋同我講 喺我嘅攝影作品入邊，真實咁樣感受到 乜嘢藝術攝影 「Fine Art Photography」。就喺Singapore呢一個展覽旅程，我認識咗好多唔同層面嘅藝術家朋友，我真心感受到藝術同埋人與人之間嘅關係。多謝Marina、多謝Brian、多謝我嘅法國藝術家朋友Sidranne同埋佢嘅囡囡Vicky 、仲有Singapore藝術家Yeni Lim 同 Vivienne，原來藝術 係真係有一個家架。
完成咗Singapore短短嘅展出，返到嚟香港，還返先前THE BLOCK – Kenneth借俾我着嘅西裝，我哋兩個吹吹吓水，竟然冒起了一個誇張嘅念頭。「半透明人間」未正式喺香港展出過，不如就係西裝店做一個展覽啦！就係咁我哋兩個用咗兩日時間去拍攝同埋製作第10張作品。之後用咗一個星期左右嘅時間，宣傳、邀請朋友、邀請合作夥伴 等等等等⋯⋯大概用咗10日嘅時間成功製作咗「半透明人間」香港篇，亦都係第一次喺香港展出「半透明人間」同埋之前嘅「單一曝光·影分身」作品。真係估都估唔到，吸引咗好多唔同嘅朋友、藝術家、同埋傳媒到咗西裝店參觀同埋分享。
仲記得嗰10日製作嘅時間，中間都有好多人幫忙，除咗Kenneth之外，仲有阿John啦，仲有阿DicK 啦，小草啦，鬼鬼啦，Tommy哥哥啦同埋昌哥等等⋯⋯亦都衍生咗一啲小故事，其中一個就係「#竟然給我看到賭神高進的背影」大家都不妨可以睇吓。
喺THE BLOCK展出嘅時間，我親身感受到大家對我嘅支持，開幕嗰晚我仲喊咗出嚟，其實「半透明」都幾特別呀！好多朋友都走過來攬住我又或者捉住我隻手，叫我唔好放棄，覺得我應該繼續做落去。為咗真係令自己繼續做落去，我就同大家講起，不如我哋做一個300人嘅「半透明人間」故事啦！又或者出一本「半透明人間」相集啦！就係咁「半透明人間」時代就開始咗啦⋯⋯
喺完結呢篇文章之前，想講返一啲題外話，我除咗做「半透明人間」之外，其實我都有好多題目同埋題材係做緊嘅，希望大家都可以參與同埋支持啦！其中一個做緊嘅題目就係「吹咩不專業影評」係用我自己嘅角度，去評論唔同嘅電影。近排睇咗一套，我超級鍾意嘅電影，套電影叫做「鬼才之道」裏面提及嘅一啲內容同我嘅「半透明人間」有啲相似，做人俾人睇唔見 如果做鬼都俾人睇唔到，唔消失又有啲乜嘢用。原來活喺「半透明人間」嘅我哋所有人，我哋係仲有機會俾人睇到，所以千祈千祈唔好放棄自己嘅所有夢想，努力咁樣將夢想造佢出嚟。
好啦！大家都睇我吹水睇咗好耐，離開之前記得去YouTube嗰度訂閱 CHAIRMENTV 繼續支持我 同埋我嘅 「吹咩不專業影評」，亦都可以聯絡我參與我嘅「半透明人間」時代，多謝大家。
ABOUT Cross-Media Artist / Experimental Artist – Alan Leung
Alan梁二 aka Alan Leung 2 aka 梁翼麟
生于八十年代香港，－九九八年開始藝術創作。中學時於英國留學，在老師Cathy Simpson 的啟發及指導下，立志成為一個藝術創作者。回港後 成立「吹咩」工作室及「八十年代有限公司」，致力於文化藝術創作、教育與交流。現職獨立短片導演、攝影、跨媒體創作人、實驗性藝術家。希望透過跨媒體藝術及實驗性藝術，令生活與藝術融合。
二零零二 至 二零零六 年間 Alan梁二 於 跨媒體藝術 上 創作了很多 實驗性作品，題材都主要圍繞着「多我」或「複我」的存在。創作媒介包括攝影、錄像、文字等；方法包括「數碼合成」、「圖層」、「多重曝光」、「剪貼」等。
Alan梁二 於 二零一零年間 於 攝影實驗中 錯誤產生出 半實體半透明人像，後來加以反覆練習、實驗及改良，創作出一系列 屬於自己 風格的 『半透明人間』藝術攝影作品。
記得follow我哋嘅
Instagram @chairmen.hk @alanleung2
www.instagram.com/chairmen.hk
www.instagram.com/alanleung2
YouTube #Subscribe
www.youtube.com/@chairmenhk/
Facebook Chairmen.hk – 吹咩
www.facebook.com/chairmenhk
Facebook 吹咩不專業影評
www.facebook.com/UnprofessionalFilmReview
Also can sponsor us by PayMe
https://payme.hsbc/alanleung2
Website
www.chairmen.hk
