Alan梁二 的「半透明人间」“SemiTransparenese” 时代
有人问我究竟乜嘢系「半透明人间」其实我冇一个真实或者肯定嘅答案，我嘅原意只系想创作「影分身」，希望呢个世界有多一个我嘅存在。喺创作上同埋交流上，唔同嘅朋友唔同嘅观众令到「半透明人间」加插咗好多嘅层次，好多嘅思想，好多个方向。今日嘅「半透明人间」系一个属于同我一齐创作，同埋同我一齐欣赏我作品嘅所有人，一个属于我哋嘅「半透明人间」时代。
有啲朋友话「半透明人间」好似影鬼相，又有啲朋友话「半透明人间」系一个小剧场；有人睇落照片入边嘅角色Fade out紧，亦有人相反话相片入边嘅角色准备出现中。一张相片，多重感受，各人有各人嘅观点与角度，越睇越精彩，有时候真系超越咗我原创者嘅谂法添。
讲返「半透明人间」究竟点样嚟？其实都有几个出发点。事情起源于2023年夏季尾秋季左右，我啱啱去完星加坡旅行，又啱啱搞完我个人嘅20周年摄影展，有一日约咗Marina同埋Brian去饮嘢，咁啱就系提起不如一齐合作搞一啲新嘅艺术展览。我就show张喺Singapore多美哥度影咗嘅玻璃屋俾Marina睇，谁不知Marina又咁啱俾一张玻璃屋嘅照片我睇，Marina话佢而家倾紧一个地方谂住搞一个艺术合展。我睇到𠮶张玻璃屋嘅相，原来就系我影𠮶张相嘅同一个地方，我二话不说就即刻答Marina，如果你真系喺𠮶度搞展览，我一定参加，因为我唔知系咪「神推鬼㧬」想我哋去做一件事。Marina话佢都有同另一个法国嘅artist倾过合展呢一件事，对方都系同我一样二话不说咁样应承；我话有我哋两个垫底，唔系唔去做呀嘛？
我个心入边谂，2024年要搞呢一个展览，我一定要好用心咁样去准备。但究竟我要做几多张作品呢？ 20张作品够唔够时间做呢？都系唔好啦，做住10张先啦。
10张嘅作品，一定要有我个人风格，亦都要有我嘅个人元素，今次我要影啲乜嘢好呢？
由千禧年中期，Kenny Sir教我摄录摄影，我就好着迷「分身术」同埋慢快门拍摄。以前做分身术，后期嘅话都会用「图层」俗称就系Layer mask,又或者用Cropping, cut and paste等等；前期嘅话「用菲林」就用多重曝光，「用数码机」多重曝光合成，什至简简单单用镜嘅反影。其实2010年之后，我已经开始试紧一啲新嘢，就系「单一曝光·影分身」。
究竟100年前啲人系点样玩「实验摄影」㗎啦？如果我将时间斩开，系咪就可以做到两个我嘅出现啊？如果我影一张1秒嘅相，我每半秒改变位置，系咪就可以斩开时间出现两个我呢呢？「单一曝光·影分身」就系咁样开始。经过无数咁多次嘅实验失败，失败，再失败；后来见到有啲朋友玩闪光灯制造出两个残影，我就尝试用佢哋嘅方法，结果都系失败，失败，再失败。
反复实验，反复嘅时间控制，反复嘅闪灯光控制，最终都系失败收场，但系喺有意无意之间我竟然影出咗好多「鬼相」。𠮶啲鬼相，当然就唔系鬼啦！因为通通都系我嘅自拍照，全部都影到我自己「半透明」但轮廓非常清晰⋯⋯奇怪啦？我影咗啲乜出嚟啊？咁恐怖，都系唔好搞啦⋯⋯
由2010年一跳就去到2016至2017年间，咁啱𠮶阵就有社区中心叫我去教摄影，学生知道我影埋影埋好多长时间曝光嘅作品，之后就叫我教佢哋点样去影。谁不知，原来我哋学生，学完之后系要去参加展览，我就觉得唔影啲特别嘅嘢点可以展出啊！我其中一个得意嘅门生佢个名叫做「方子浩」，我就问佢想唔想试吓影「半透明人」，点知我哋影咗出嚟，就为摄影带嚟咗一丁点回响。「方子浩」影咗张「半消失嘅佢」嘅黑白相，反映咗人生百态！又上电台做访问，又上埋报纸，但系可惜我哋两个最终都冇红到！
讲到呢度，就又要飞返去2023年秋夏，我为咗2024年嘅Singapore展览仲烦恼紧！要有我个人特色，又要有我个人风格嘅摄影作品，咪就系 「半透明」 又可以「分身」嘅我囉！咁究竟叫咩名好呢？透明人摄影；如果系透明，就睇唔到啦！咁即系一定要用半透明！之前有个漫画同电影叫做「透明人间」；而我嘅作品就系关于半透明人时间，不如就叫「半透明人间」啦！就系咁「半透明人间」就开始咗啦⋯⋯后来先知道好似系日本一首歌嘅名，但𠮶首歌与我无关㗎！我亦都冇抄佢㗎！咁啱㗎咋！
喺我仲谂紧点样去创作我新嘅摄影作品，Marina就同我讲已经签好咗新加坡展览场地合约。我同Brian就即刻Yeah Yeah Yeah 啦！谁不知原来得返两个月左右嘅时间，影10张实验作品其实真系唔难，难就难在我想加入好多新嘅元素。以前我影嘅「单一曝光·影分身」相片同埋「方子浩」影嘅「半消失嘅佢」都系黑白照片，今次有机会去星加坡展出，我加入啲乜嘢元素好呢？喺𠮶阵时，咁啱Kevin Tam揾我试新发型style，话试吓帮我整个绿色头，就系咁启发咗一啲新嘅谂法，我就同Kevin讲你帮我整头，我就用你嚟影实验相。染头发，系要破坏头发嘅颜色；如果我影相，之后破坏相片原有嘅颜色，又会系啲咩新搞法呢？就系咁，我哋两个就合作影同埋制作咗第一张「半透明人间」嘅作品。全新嘅「单一曝光·影分身」相片变成咗「半透明人间」，同以往唔同嘅唔单只系由黑白变成色彩缤纷，再且挑战30秒之内拍摄三个影分身对象，再挑战拍摄9个唔同嘅人9个唔同嘅故事。由原定嘅10个作品减至九个新作品，因为九张相好似九宫格咁随时分拆合并唔同嘅排位可以有好多变化。
好多谢9个唔同嘅朋友，同我一齐癫一齐创作「半透明人间」呢一个系列。每个人都尝试放一啲自己嘅元素喺「半透明人间」入边，增强咗除咗拍摄嘅难度之外，仲加强咗照片背后嘅故事性同埋原创性。排名不分先后「发型设计”Kevin Tam”、DJ Nat King (巨人）、香港跳高运动员”Tiffany Tang”、饮食评论员”Zacky 石儿”、女权主义者”Ritsu”、音乐人”Russell”、我的学生”鬼鬼”、乜乜女孩”Joanne” 同埋 爱群理发店 嘅 店主 “阿Mark”」
除咗拍摄之外，其实打印同埋包装运送，整个创作团队都花咗好多唔同嘅心机。首先要多谢照相馆嘅Tommy哥哥同埋昌哥，为咗我嘅展出试咗好多种唔同嘅纸质打印，最后就揾到我最喜欢嘅纸质，就系Metallic Gloss Paper，一种好适合呈现「半透明人间」嘅纸张物料！之后亦都要感谢Cathy仔包装同埋装嵌每一张嘅摄影作品，确保每一张作品都系安全嘅情况之下运到海外。
终于完成咗九张「半透明人间」作品带到去星加坡参与 “Connecting Colors Arts Exhibition” Curated by Brandstorm Communications Visual Arts Centre, Singapore嘅展出。原先只不过系为咗完成海外展出嘅一个心愿，真系冇谂过，好多嘅观众俾咗我好多支持同埋鼓励性嘅说话。大家都睇到，非多重曝光 同埋 非数码合成 加上色彩破坏，原来可以影出咁靓嘅相，佢哋同我讲 喺我嘅摄影作品入边，真实咁样感受到 乜嘢艺术摄影 「Fine Art Photography」。就喺Singapore呢一个展览旅程，我认识咗好多唔同层面嘅艺术家朋友，我真心感受到艺术同埋人与人之间嘅关系。多谢Marina、多谢Brian、多谢我嘅法国艺术家朋友Sidranne同埋佢嘅囡囡Vicky 、仲有Singapore艺术家Yeni Lim 同 Vivienne，原来艺术 系真系有一个家架。
完成咗Singapore短短嘅展出，返到嚟香港，还返先前THE BLOCK – Kenneth借俾我着嘅西装，我哋两个吹吹吓水，竟然冒起了一个夸张嘅念头。「半透明人间」未正式喺香港展出过，不如就系西装店做一个展览啦！就系咁我哋两个用咗两日时间去拍摄同埋制作第10张作品。之后用咗一个星期左右嘅时间，宣传、邀请朋友、邀请合作伙伴 等等等等⋯⋯大概用咗10日嘅时间成功制作咗「半透明人间」香港篇，亦都系第一次喺香港展出「半透明人间」同埋之前嘅「单一曝光·影分身」作品。真系估都估唔到，吸引咗好多唔同嘅朋友、艺术家、同埋传媒到咗西装店参观同埋分享。
仲记得𠮶10日制作嘅时间，中间都有好多人帮忙，除咗Kenneth之外，仲有阿John啦，仲有阿DicK 啦，小草啦，鬼鬼啦，Tommy哥哥啦同埋昌哥等等⋯⋯亦都衍生咗一啲小故事，其中一个就系「#竟然给我看到赌神高进的背影」大家都不妨可以睇吓。
喺THE BLOCK展出嘅时间，我亲身感受到大家对我嘅支持，开幕𠮶晚我仲喊咗出嚟，其实「半透明」都几特别呀！好多朋友都走过来揽住我又或者捉住我只手，叫我唔好放弃，觉得我应该继续做落去。为咗真系令自己继续做落去，我就同大家讲起，不如我哋做一个300人嘅「半透明人间」故事啦！又或者出一本「半透明人间」相集啦！就系咁「半透明人间」时代就开始咗啦⋯⋯
喺完结呢篇文章之前，想讲返一啲题外话，我除咗做「半透明人间」之外，其实我都有好多题目同埋题材系做紧嘅，希望大家都可以参与同埋支持啦！其中一个做紧嘅题目就系「吹咩不专业影评」系用我自己嘅角度，去评论唔同嘅电影。近排睇咗一套，我超级钟意嘅电影，套电影叫做「鬼才之道」里面提及嘅一啲内容同我嘅「半透明人间」有啲相似，做人俾人睇唔见 如果做鬼都俾人睇唔到，唔消失又有啲乜嘢用。原来活喺「半透明人间」嘅我哋所有人，我哋系仲有机会俾人睇到，所以千祈千祈唔好放弃自己嘅所有梦想，努力咁样将梦想造佢出嚟。
好啦！大家都睇我吹水睇咗好耐，离开之前记得去YouTube𠮶度订阅 CHAIRMENTV 继续支持我 同埋我嘅 「吹咩不专业影评」，亦都可以联络我参与我嘅「半透明人间」时代，多谢大家。
ABOUT Cross-Media Artist / Experimental Artist – Alan Leung
Alan梁二 aka Alan Leung 2 aka 梁翼麟
生于八十年代香港，－九九八年开始艺术创作。中学时于英国留学，在老师Cathy Simpson 的启发及指导下，立志成为一个艺术创作者。回港后 成立「吹咩」工作室及「八十年代有限公司」，致力于文化艺术创作、教育与交流。现职独立短片导演、摄影、跨媒体创作人、实验性艺术家。希望透过跨媒体艺术及实验性艺术，令生活与艺术融合。
二零零二 至 二零零六 年间 Alan梁二 于 跨媒体艺术 上 创作了很多 实验性作品，题材都主要围绕着「多我」或「复我」的存在。创作媒介包括摄影、录像、文字等；方法包括「数码合成」、「图层」、「多重曝光」、「剪贴」等。
Alan梁二 于 二零一零年间 于 摄影实验中 错误产生出 半实体半透明人像，后来加以反复练习、实验及改良，创作出一系列 属于自己 风格的 『半透明人间』艺术摄影作品。
记得follow我哋嘅
Instagram @chairmen.hk @alanleung2
www.instagram.com/chairmen.hk
www.instagram.com/alanleung2
YouTube #Subscribe
www.youtube.com/@chairmenhk/
Facebook Chairmen.hk – 吹咩
www.facebook.com/chairmenhk
Facebook 吹咩不专业影评
www.facebook.com/UnprofessionalFilmReview
Also can sponsor us by PayMe
https://payme.hsbc/alanleung2
Website
www.chairmen.hk
