
Alan梁二 的 “SemiTransparenese” 「半透明人間」《自愛》”Regard for Oneself”

當第一個半透明人間展覽完結,我就不斷咁樣尋找新嘅展出機會,同埋不斷咁樣去搵朋友去拍攝新嘅作品同埋故事。
當我同阿EU做緊攝影實驗嘅時候,突然間阿EU又同我分享一啲不愉快嘅經歷。其實愛係乜嘢啊?我哋兩個成日都會討論呢啲問題;不斷咁樣去尋求被愛,又或者不斷咁樣去尋求乜嘢係愛。人,不如懂得學識自愛;其實人最愛嘅就係自己,如果唔識得愛惜自己嘅人,根本都唔會愛別人,亦都根本唔會被愛。懂得愛惜自己,懂得自愛,人就會改變。人本身就係要自己行先,由本我去到自我,去到自私,去到自愛。如果唔係為咗自己嘅,根本就生存唔到。如果你覺得缺乏愛,點解唔去嘗試了解吓自己,又唔去嘗試用力咁樣攬一下自己。
就係因為有攬吓自己呢個概念,我同埋阿EU就嘗試去做一張新嘅「半透明人間」作品 《自愛》,我哋兩個覺得我哋會影得出嘅,會將虛實嘅幻想變成事實。由於上一次嘅半透明人間展覽,其中一張作品「Tiffany Tang」(家姐) ,佢成功咁樣捉到自己嘅腳,同埋唧到自己笑,我哋就以自己同自己做到一啲交感接觸,去做今次嘅創作藍本。

最終我同阿EU都影咗好多次,先至成功製作出「半透明人間」作品 《自愛》。之後攞住 《自愛》呢一張作品,竟然搵到一個支持我哋去做展覽嘅人。多謝你 Pauline !

記得認識Pauline係一兩年前法國五月節有關於香水嘅活動。其實我覺得Pauline嗰度間香水店,好適合搞展覽,搞我半透明人間嘅創作,因為近幾年我都由影黑白相,慢慢變成色彩繽紛嘅創作。香水店,比我嘅意識,係非常之配合色彩繽紛嘅嘢。喺某一次嘅香水店活動,我突然間好大膽咁走埋去Pauline身邊,問吓佢有冇興趣合作搞藝術展?Pauline同我講,俾啲時間佢諗吓睇吓可以點搞。我以為大家都係吹吓水就會冇咗件事。估唔到Pauline真係將我說話擺喺心度,喺2024年暑假前嘅某活動,Pauline就應承咗我秋季展出嘅決定。



半透明人間 《自愛》由一張作品,變成一個展覽題目。我搵咗好多唔同嘅朋友幫手,好多新嘅故事內容,好多嘅概念,加入咗好多新嘅感覺;其實喺製作同埋創作嘅期間,都遇到好多人事嘅問題,但確實係一個好好嘅回憶。今次嘅作品,唔單止加入咗好多新嘅元素,攝影作品仲用咗全新嘅高清鋁片打印,感覺別有一番風味。



希望鍾意嘅朋友,都可以向我買啲作品,又或者可以金錢資助一下繼續我嘅創作。半透明人間嘅故事,其實只不過係啱啱開始,因為慢慢咁樣有你同埋其他人嘅加入,我哋已經走進左「半透明人間」時代。
如果大家有興趣都想參與我嘅拍攝,記得就話俾我知啦!一個作品就係你呀!


記得follow我哋嘅
Instagram @chairmen.hk @alanleung2
www.instagram.com/chairmen.hk
www.instagram.com/alanleung2
YouTube #Subscribe
www.youtube.com/@chairmenhk/
Facebook Chairmen.hk – 吹咩
www.facebook.com/chairmenhk
Facebook 吹咩不專業影評
www.facebook.com/UnprofessionalFilmReview
Also can sponsor us by PayMe
https://payme.hsbc/alanleung2
Website
www.chairmen.hk