Alan梁二 的 “SemiTransparenese” 「半透明人间」《听城》“Soundscape”
记得喺2021年至到2022年嘅期间，𠮶阵时仲系疫情，好多活动都停止咗，其实外出嘅机会都非常之少。唔知系咪因为疫情嘅关系，反而多咗好多摄影比赛。有啲系关于香港嘅地标、有啲就系关于香港嘅文化古蹟，故事开头就系同摄影比赛有关。
事源于因为我参加咗坚尼地城 乜农圃 嘅摄影比赛，所以就喺中环到坚尼地城地区，大街小巷兜来兜去，顺便揾吓有乜嘢特色嘢影吓同埋写下故事。路过城皇街，聚贤居一带，见到有一栋灰色嘅楼深深吸引住我，佢好似同周边嘅高楼大厦格格不入，而且佢所有嘅窗都黏晒胶纸，咁得意嘅？自己个心入边就谂，如果呢幢楼唔死 “拆卸”（我好钟意用死字去形容消失中的死物），我就真系好想有机会可以同佢做一个展览又或者做一个艺术作品。
偶然嘅机会喺2024年大约四五月左近，喺某个展览认识到阿TA，之后我就分享俾佢睇，我年初嘅「半透明人间」展览作品。阿TA突然间问我有冇兴趣，系佢哋嘅Community Room做一啲艺术分享，我当然就二话不说咁应承啦「正㖞喺边度㗎？」 阿TA就同我讲，佢哋哋个地址呢，就喺士丹顿街88号，PMQ嘅后边。我谂咗一谂，就打开我嘅相簿，俾阿TA睇吓，系咪呢一个地方啊？阿TA就即刻答我，系呀就系呢度啦！点解你会影咗呢一张相嘅？咁我就将上边嘅故事讲咗俾佢TA听。「唔系咁啱呀嘛？」
就系因为以上嘅故事，我就决定咗要做一个关于我同呢度嘅展览，当然就一定要有我自己嘅元素啦！「半透明人间」就一定走唔甩，因为佢已经系我嘅一部份，不过今次又会加入一啲咩嘢新嘅元素呢？
前一排我同ChungDha构思紧一个新嘅故事，一个新嘅剧本，同我哋过往嘅作品有啲相似，都系讲及视障人士，起初嘅时候ChungDha就好想用「Sound escape」后来我就改咗做「Soundscape」，就好似「Landscape ，Cityscape 」咁样！「Soundscape」嘅中文我哋两个谂咗好耐；我哋两个有一首共同都好钟意嘅歌，就系许美静嘅「倾城」；我哋两个就谂不如将「Soundscape」改造《听城》啦！
一个展览叫《听城》，乜唔系用眼睇嘅咩？
我今次喺 「华贤坊西」搞展览，唔单止想大家睇到我「半透明人间」嘅作品，仲想大家喺行过嚟嘅时候，细心听吓周围嘅声音，细心感受一下周边嘅环境。城市中嘅历史古蹟，过去嘅人佢哋听到嘅，又系咪同我哋听到嘅一样㗎啦？听，呢个听字，又有听闻嘅意思。我哋人生听闻过好多个故事，有几多系真？有几多系假？有几多系幻想出嚟？又有几多系有人见证？不如亲身去睇一下见证一下。听我讲故事，同时睇我嘅展览，又有几多我同大家分享嘅，会系同大家认知嘅一模一样呢？用眼去睇，用耳去听，一齐感受我呢个故事。
喺展览入边，除咗可以睇到我嘅摄影作品，仲可以同我分享一下每一张作品背后嘅故事。除咗摄影作品之外，我都会贴咗一啲QR code，大家都可以听吓我嘅音乐，睇吓我嘅短片，大家都可以听吓我讲嘅电影影评(记得订阅一下我嘅YouTube Channel啊 #吹咩不专业影评)。当然有兴趣都可以联络我，订购我嘅摄影作品，又或者你想成为我下一个拍摄对象都可以㗎！
「半透明人间 」《听城》展览除咗可以现场，同埋网上睇或者听之外。展览期间嘅每一个周末，我都会亲身到现场同大家分享同埋交流，希望大家多多支持啦！
记得follow我哋嘅
Instagram @chairmen.hk @alanleung2
www.instagram.com/chairmen.hk
www.instagram.com/alanleung2
YouTube #Subscribe
www.youtube.com/@chairmenhk/
Facebook Chairmen.hk – 吹咩
www.facebook.com/chairmenhk
Facebook 吹咩不专业影评
www.facebook.com/UnprofessionalFilmReview
Also can sponsor us by PayMe
https://payme.hsbc/alanleung2
Website
www.chairmen.hk
