【#咩FILM】【#咩电影】【#咩MOVIES】
【吹咩不专业影评】
《河边的错误》- Only The River Flows
#吹咩不专业影评 #不专业影评 #观后感 by Alan Leung 2
《河边的错误》｜改编自余华同名小说｜魏书钧第四度入选康城影展作品｜
因为未正式睇过「余华」原著小说版本嘅《河边的错误》，所以喺网上搜寻咗一啲小说嘅资料。小说故事应该系讲「老婆婆」喺河边被自己照顾嘅「疯子」杀死，但由于「疯子」喺有精神问题，所以无办法进行正常嘅法律审判。警队「马哲」喺查案嘅时候越查越深，更有可能越查越错，明明「疯子」就系杀手，点解？「疯子」佢仲可以，喺条村度四围走啦？最后警队「马哲」杀死咗「疯子」，完成咗非法律或道德上嘅审判，「马哲」自己就变成一个杀人犯，同样咁佢自己又要面临法律同埋道德嘅审判。「马哲」为咗要脱罪，就话自己系癫嘅，有精神病，佢将自己变成咗另一个「疯子」⋯⋯ 我喺网上边，揾到《河边的错误》小说版嘅资料就大约系咁，其实听落都几好睇，有少少似《 正义回廊 》（The Sparring Partner ）讲紧嘅 审判与精神病 嘅挂钩关系。有机会行开书店，我都想试吓买返本《河边的错误》返屋企睇吓！
讲返套电影先，电影嘅一开头出现咗首英文嘅诗，有唔少嘅人话首诗喺套电影嘅主要解题，但系我都未睇得切啲英文加中文字幕，首诗就已经fade out咗！接住就系几个小朋友喺度玩「捉儿人」，做捉人𠮶个细佬系扮紧警察嘅style，佢戴住一顶警察帽，着住一件透明嘅便利雨衣，雨褛入边系一件写住英文「乜乜警察」之类嘅字，个细佬仲揸住一把塑胶玩具手枪。扮警察嘅细路，好神似咁样慢慢喺条走廊到行，双手攞住玩具手枪，一对一对门咁样踢开，谁不知去到走廊嘅最中间最尾𠮶对门，佢一踢开就差啲跌咗落街，原来佢哋喺一幢拆卸紧嘅楼入边玩紧⋯⋯呢个就系电影嘅开始。
电影故事可能话俾我哋听！其实警察捉贼查案，系咪真系好似小朋友玩「捉儿人」嘅心态呢？步步惊心，步步为营，每一步都要小心翼翼咁样去行，每一处都要细心咁样去观察，一不留神可能就会堕入危险嘅深渊，甚至连条命都冇埋！
电影入边，99%嘅警察(公安)都系着住传统嘅制服，唯独是男主角「马哲」系着住一件黑色皮褛，我谂佢应该系CID，开头仲以为佢唔系警察添！「马哲」去咗干部𠮶度开会，高层嘅同佢讲啦！喺戏院𠮶度做Office几好，反正依家啲电影都冇人睇，喺𠮶度查案容易啲方便啲。
我就喺度谂，点解要拣间戏院来做Office呢？所谓方便啲，唔通佢哋系特工？秘密警察？
跟住落嚟电影就正式开始！就系关于「河边」离奇杀人事件嘅故事。死者系一个阿婆，杀人凶手不明，阿婆有一个所谓「养子」「疯子」，「疯子」 因为系癫嘅，好可能佢就系杀人凶手，但系啲街坊街里就话「疯子」 好纯嘅，佢只系喺条街度四围行四围走㗎咋，冇人相信佢就系杀人凶手⋯⋯发现尸体嘅系一个小朋友，一个讲真话都冇人信嘅小朋友，同时间佢就系一个经常打骂「疯子」 嘅人⋯⋯死者嘅身边有一个手袋，手袋入边有一盒录音带，唔知点解「马哲」觉得盒录音带同凶手有关，去追查之下发掘出不可告人嘅恋情；因为发掘出不可告人嘅恋情，又发现咗新嘅凶手线索「大波浪」⋯⋯ 案件越查越深，越查越远，查出咗好多与谋杀案无关，但与其他人相关嘅不可告人秘密⋯⋯最后死嘅唔单止有阿婆、仲有不可告人恋情嘅男主角、收收埋埋嘅「大波浪」、同埋发现尸体嘅小朋友⋯⋯案件变得越嚟越复杂，「马哲」都慢慢变得癫起嚟！喺好多嘅角度，系好多嘅证据都证明「疯子」就系凶手，系「马哲」唔肯去相信，定系因为拥有一个太大求知欲同埋追查凶手嘅心呢？
电影最终其实冇一个正确嘅答案，每一段嘅故事可能都系一个结局，虚虚实实，可能系「马哲」幻想出嚟，又可能系 导演 幻想出嚟⋯⋯睇过一啲访问，作者「余华」话 ：「导演 将《河边的错误》确确实实咁样拍咗出嚟！」 明明 导演就将 《河边的错误》 改编咗好多⋯⋯点解？「余华」讲 导演 将佢嘅故事 真实咁样拍佢出嚟呢？ 记唔记得开头我搜寻有关《河边的错误》资料嘅时候，揾到好多有关「疯子」同埋精神病嘅问题⋯⋯将人迫到变成「疯子」，有人扮到变成「疯子」⋯⋯当观众都变成「疯子」了⋯⋯其实电影就确实咁样成功咗！⋯⋯
电影里边其实仲有好多讨论嘅空间「1995年」、「英文字母外套」、「黑色的皮褛」、「戏院办公室」、「神秘的录音带」、「大波浪」、「乒乓波」、「砌图」、「墙上面的四发子弹」、「三星勋章」、「没有人有的获奖记忆」、「穿上制服的马哲」、「一家三口在泡浴」、「浴中的小鸭子」、「男死者身旁的录音机」、「戏院外电影两个字跌了下来」⋯⋯等等
原著入边有一个冇记载嘅角色，就系 『三夫』女主角 「曾美慧孜」 饰演嘅 马哲太太「白洁」，「白洁」喺电影入边只系出现咗几次！第一次就系喺电影开头扮警察小朋友差啲跌落街嘅时候，之后一幕出现。当时「白洁」趴喺张枱度瞓紧觉，佢嘅左手边就系一个卡式带机。卡式带机播放紧嘅音乐，就系扮警察小朋友玩紧「捉儿人」时嘅背景音乐。「白洁」同「马哲」讲佢成日发梦，但系永远都唔记得个梦系讲紧乜⋯⋯ 「白洁」之后出现就系有咗
「马哲」嘅小孩⋯⋯之后医生诊断肚入面嘅小孩有可能系智力有问题⋯⋯ 「白洁」同「马哲」感情出现分歧，源于要唔要保住肚入边个细路⋯⋯ 「白洁」最后一次出现就系同「马哲」一齐，帮紧一个出世冇耐嘅小朋友系BB盘冲凉⋯⋯
点解电影入边会加入「白洁」呢个角色呢？而且佢仲要出现喺，头同埋尾嘅片段，唔通「白洁」先至系主角？一切一切，都只不过系「白洁」嘅一场梦？大家都可以买飞睇呢套电影，一齐感受一下，之后讨论一下，电影嘅魔力。
今次呢套《河边的错误》真系有好多可以讨论或者交流感受嘅空间！网上边有好多世界各地唔同嘅影评人，都列出咗好多讨论嘅观点同埋唔同嘅角度！我自己反而被一句说话执着住⋯⋯喺《河边的错误》电影入边 警察高层干部 对「马哲」讲个句「电影已经冇人睇」所以攞嚟做办公室/查案室！好多影评人都话，呢套冇结局又疑似好多结局嘅电影系想将观众都变成抓狂嘅「疯子」，但系我个人认为，导演系想同我哋讲，千祈唔好变成一个查案嘅「疯子」，要记得我哋系一个「观众」！⋯⋯ 「电影已经冇人睇」攞间戏院嚟查案啦，但系呢一套电影，我或者我哋就确确实实系电影嘅观众⋯⋯记得要清楚明白今次《河边的错误》系一套电影，唔系嘅话，就会越谂越多，越踩越深，变成咗「马哲」变成咗「疯子」，而唔系梦醒之后唔记得个梦嘅「白洁」⋯⋯
今次嘅讨论暂时就系咁多，唔知道你睇完之后又会领悟到乜嘢感受，之后又有啲乜嘢可以同大家分享？电影嘅本身就系冇对与错，系有唔同嘅角度，系有唔同嘅含意，一个人睇始终都唔及一大班人睇好。有时候我哋睇到嘅嘢，都可能超出导演又或者原著作者嘅解读或者表达意义，咁先至系艺术咁先至系人生。
官方资料:
【#咩FILM】【#咩电影】【#咩MOVIES】
《河边的错误》- Only The River Flows
改编自余华同名小说 先锋黑色犯罪艺术电影
12.21上映
《永安镇故事集》《野马分鬃》《延边少年》第四度入选康城影展、中国新锐导演魏书钧 执导
《消失的她》《人生大事》金鸡奖影帝 朱一龙
《金钱男孩》《三夫》金像奖影后 曾美慧孜 主演
本片改编自余华同名先锋代表作，并入围第76届康城影展「一种关注」官方单元。在一个被河溪环绕的小镇上，发生一桩离奇诡异的命案。一个天色刚暗的入夜时分，一位老太太（曹阳 饰）在河边倒地，颈部有柴刀的伤痕。刑警队长马哲（朱一龙 饰）受命调查此案，然而案件疑点重重，愈查死人愈多。老年人的性欲，中年人的诗歌与私情，青年人的异装癖，小孩子的强烈窥视欲。到底一切之间有没有共通点？整个小镇弥漫不安和恐慌气氛，连马哲本人也被拖入这小镇的暗流之中⋯⋯
官方都送咗电影海报Softcopy俾大家download
片名：《河边的错误》 – Only The River Flows
香港上映日期 ：12月21日
片种：黑色/犯罪
语言：普通话 (中文、英文字幕)
片长：102 分钟
级别：IIA
导演：《永安镇故事集》《野马分鬃》《延边少年》 #魏书钧
编剧：《永安镇故事集》《野马分鬃》《延边少年》魏书钧 康春雷
原著小说：《河边的错误》 #余华
主演：《消失的她》《人生大事》 #朱一龙
《金钱男孩》《三夫》 #曾美慧孜
发行公司：安乐影片有限公司
Edko Films Ltd. 安乐影片
#OnlyTheRiversFlows#河边的错误#EdkoFilms#安乐影片#FILMS#MOVIES#CINEMA#COMINGSOON#STiLLS#POSTER#TRAILERChung Dha#海报#预告#电影简介#剧照
记得follow我哋嘅
Instagram @chairmen.hk @alanleung2
www.instagram.com/chairmen.hk
www.instagram.com/alanleung2
YouTube #Subscribe
www.youtube.com/@chairmenhk/
Facebook Chairmen.hk – 吹咩
www.facebook.com/chairmenhk
Facebook 吹咩不专业影评
www.facebook.com/UnprofessionalFilmReview
Also can sponsor us by PayMe
https://payme.hsbc/alanleung2
Website
www.chairmen.hk
