【#咩FILM】【#咩電影】【#咩MOVIES】
【吹咩不專業影評】
《河邊的錯誤》- Only The River Flows
#吹咩不專業影評 #不專業影評 #觀後感 by Alan Leung 2
《河邊的錯誤》｜改編自余華同名小說｜魏書鈞第四度入選康城影展作品｜
因為未正式睇過「余華」原著小說版本嘅《河邊的錯誤》，所以喺網上搜尋咗一啲小說嘅資料。小說故事應該係講「老婆婆」喺河邊被自己照顧嘅「瘋子」殺死，但由于「瘋子」喺有精神問題，所以無辦法進行正常嘅法律審判。警隊「馬哲」喺查案嘅時候越查越深，更有可能越查越錯，明明「瘋子」就係殺手，點解？「瘋子」佢仲可以，喺條村度四圍走啦？最後警隊「馬哲」殺死咗「瘋子」，完成咗非法律或道德上嘅審判，「馬哲」自己就變成一個殺人犯，同樣咁佢自己又要面臨法律同埋道德嘅審判。「馬哲」為咗要脫罪，就話自己係癲嘅，有精神病，佢將自己變成咗另一個「瘋子」⋯⋯ 我喺網上邊，搵到《河邊的錯誤》小說版嘅資料就大約係咁，其實聽落都幾好睇，有少少似《 正義迴廊 》（The Sparring Partner ）講緊嘅 審判與精神病 嘅掛鉤關係。有機會行開書店，我都想試吓買返本《河邊的錯誤》返屋企睇吓！
講返套電影先，電影嘅一開頭出現咗首英文嘅詩，有唔少嘅人話首詩喺套電影嘅主要解題，但係我都未睇得切啲英文加中文字幕，首詩就已經fade out咗！接住就係幾個小朋友喺度玩「捉兒人」，做捉人嗰個細佬係扮緊警察嘅style，佢戴住一頂警察帽，着住一件透明嘅便利雨衣，雨褸入邊係一件寫住英文「乜乜警察」之類嘅字，個細佬仲揸住一把塑膠玩具手槍。扮警察嘅細路，好神似咁樣慢慢喺條走廊到行，雙手攞住玩具手槍，一對一對門咁樣踢開，誰不知去到走廊嘅最中間最尾嗰對門，佢一踢開就差啲跌咗落街，原來佢哋喺一幢拆卸緊嘅樓入邊玩緊⋯⋯呢個就係電影嘅開始。
電影故事可能話俾我哋聽！其實警察捉賊查案，係咪真係好似小朋友玩「捉兒人」嘅心態呢？步步驚心，步步為營，每一步都要小心翼翼咁樣去行，每一處都要細心咁樣去觀察，一不留神可能就會墮入危險嘅深淵，甚至連條命都冇埋！
電影入邊，99%嘅警察(公安)都係着住傳統嘅制服，唯獨是男主角「馬哲」係着住一件黑色皮褸，我諗佢應該係CID，開頭仲以為佢唔係警察添！「馬哲」去咗幹部嗰度開會，高層嘅同佢講啦！喺戲院嗰度做Office幾好，反正依家啲電影都冇人睇，喺嗰度查案容易啲方便啲。
我就喺度諗，點解要揀間戲院來做Office呢？所謂方便啲，唔通佢哋係特工？秘密警察？
跟住落嚟電影就正式開始！就係關於「河邊」離奇殺人事件嘅故事。死者係一個阿婆，殺人兇手不明，阿婆有一個所謂「養子」「瘋子」，「瘋子」 因為係癲嘅，好可能佢就係殺人兇手，但係啲街坊街里就話「瘋子」 好純嘅，佢只係喺條街度四圍行四圍走㗎咋，冇人相信佢就係殺人兇手⋯⋯發現屍體嘅係一個小朋友，一個講真話都冇人信嘅小朋友，同時間佢就係一個經常打罵「瘋子」 嘅人⋯⋯死者嘅身邊有一個手袋，手袋入邊有一盒錄音帶，唔知點解「馬哲」覺得盒錄音帶同兇手有關，去追查之下發掘出不可告人嘅戀情；因為發掘出不可告人嘅戀情，又發現咗新嘅兇手線索「大波浪」⋯⋯ 案件越查越深，越查越遠，查出咗好多與謀殺案無關，但與其他人相關嘅不可告人秘密⋯⋯最後死嘅唔單止有阿婆、仲有不可告人戀情嘅男主角、收收埋埋嘅「大波浪」、同埋發現屍體嘅小朋友⋯⋯案件變得越嚟越複雜，「馬哲」都慢慢變得癲起嚟！喺好多嘅角度，係好多嘅證據都證明「瘋子」就係兇手，係「馬哲」唔肯去相信，定係因為擁有一個太大求知欲同埋追查兇手嘅心呢？
電影最終其實冇一個正確嘅答案，每一段嘅故事可能都係一個結局，虛虛實實，可能係「馬哲」幻想出嚟，又可能係 導演 幻想出嚟⋯⋯睇過一啲訪問，作者「余華」話 ：「導演 將《河邊的錯誤》確確實實咁樣拍咗出嚟！」 明明 導演就將 《河邊的錯誤》 改編咗好多⋯⋯點解？「余華」講 導演 將佢嘅故事 真實咁樣拍佢出嚟呢？ 記唔記得開頭我搜尋有關《河邊的錯誤》資料嘅時候，搵到好多有關「瘋子」同埋精神病嘅問題⋯⋯將人迫到變成「瘋子」，有人扮到變成「瘋子」⋯⋯當觀眾都變成「瘋子」了⋯⋯其實電影就確實咁樣成功咗！⋯⋯
電影裏邊其實仲有好多討論嘅空間「1995年」、「英文字母外套」、「黑色的皮褸」、「戲院辦公室」、「神秘的錄音帶」、「大波浪」、「乒乓波」、「砌圖」、「牆上面的四發子彈」、「三星勳章」、「沒有人有的獲獎記憶」、「穿上制服的馬哲」、「一家三口在泡浴」、「浴中的小鴨子」、「男死者身旁的錄音機」、「戲院外電影兩個字跌了下來」⋯⋯等等
原著入邊有一個冇記載嘅角色，就係 『三夫』女主角 「曾美慧孜」 飾演嘅 馬哲太太「白潔」，「白潔」喺電影入邊只係出現咗幾次！第一次就係喺電影開頭扮警察小朋友差啲跌落街嘅時候，之後一幕出現。當時「白潔」趴喺張枱度瞓緊覺，佢嘅左手邊就係一個卡式帶機。卡式帶機播放緊嘅音樂，就係扮警察小朋友玩緊「捉兒人」時嘅背景音樂。「白潔」同「馬哲」講佢成日發夢，但係永遠都唔記得個夢係講緊乜⋯⋯ 「白潔」之後出現就係有咗
「馬哲」嘅小孩⋯⋯之後醫生診斷肚入面嘅小孩有可能係智力有問題⋯⋯ 「白潔」同「馬哲」感情出現分歧，源於要唔要保住肚入邊個細路⋯⋯ 「白潔」最後一次出現就係同「馬哲」一齊，幫緊一個出世冇耐嘅小朋友係BB盤沖涼⋯⋯
點解電影入邊會加入「白潔」呢個角色呢？而且佢仲要出現喺，頭同埋尾嘅片段，唔通「白潔」先至係主角？一切一切，都只不過係「白潔」嘅一場夢？大家都可以買飛睇呢套電影，一齊感受一下，之後討論一下，電影嘅魔力。
今次呢套《河邊的錯誤》真係有好多可以討論或者交流感受嘅空間！網上邊有好多世界各地唔同嘅影評人，都列出咗好多討論嘅觀點同埋唔同嘅角度！我自己反而被一句說話執着住⋯⋯喺《河邊的錯誤》電影入邊 警察高層幹部 對「馬哲」講個句「電影已經冇人睇」所以攞嚟做辦公室/查案室！好多影評人都話，呢套冇結局又疑似好多結局嘅電影係想將觀眾都變成抓狂嘅「瘋子」，但係我個人認為，導演係想同我哋講，千祈唔好變成一個查案嘅「瘋子」，要記得我哋係一個「觀眾」！⋯⋯ 「電影已經冇人睇」攞間戲院嚟查案啦，但係呢一套電影，我或者我哋就確確實實係電影嘅觀眾⋯⋯記得要清楚明白今次《河邊的錯誤》係一套電影，唔係嘅話，就會越諗越多，越踩越深，變成咗「馬哲」變成咗「瘋子」，而唔係夢醒之後唔記得個夢嘅「白潔」⋯⋯
今次嘅討論暫時就係咁多，唔知道你睇完之後又會領悟到乜嘢感受，之後又有啲乜嘢可以同大家分享？電影嘅本身就係冇對與錯，係有唔同嘅角度，係有唔同嘅含意，一個人睇始終都唔及一大班人睇好。有時候我哋睇到嘅嘢，都可能超出導演又或者原著作者嘅解讀或者表達意義，咁先至係藝術咁先至係人生。
官方資料:
【#咩FILM】【#咩電影】【#咩MOVIES】
《河邊的錯誤》- Only The River Flows
改編自余華同名小說 先鋒黑色犯罪藝術電影
12.21上映
《永安鎮故事集》《野馬分鬃》《延邊少年》第四度入選康城影展、中國新銳導演魏書鈞 執導
《消失的她》《人生大事》金雞獎影帝 朱一龍
《金錢男孩》《三夫》金像獎影后 曾美慧孜 主演
本片改編自余華同名先鋒代表作，並入圍第76屆康城影展「一種關注」官方單元。在一個被河溪環繞的小鎮上，發生一樁離奇詭異的命案。一個天色剛暗的入夜時分，一位老太太（曹陽 飾）在河邊倒地，頸部有柴刀的傷痕。刑警隊長馬哲（朱一龍 飾）受命調查此案，然而案件疑點重重，愈查死人愈多。老年人的性欲，中年人的詩歌與私情，青年人的異裝癖，小孩子的強烈窺視欲。到底一切之間有沒有共通點？整個小鎮瀰漫不安和恐慌氣氛，連馬哲本人也被拖入這小鎮的暗流之中⋯⋯
官方都送咗電影海報Softcopy俾大家download
片名：《河邊的錯誤》 – Only The River Flows
香港上映日期 ：12月21日
片種：黑色/犯罪
語言：普通話 (中文、英文字幕)
片長：102 分鐘
級別：IIA
導演：《永安鎮故事集》《野馬分鬃》《延邊少年》 #魏書鈞
編劇：《永安鎮故事集》《野馬分鬃》《延邊少年》魏書鈞 康春雷
原著小說：《河邊的錯誤》 #余華
主演：《消失的她》《人生大事》 #朱一龍
《金錢男孩》《三夫》 #曾美慧孜
發行公司：安樂影片有限公司
Edko Films Ltd. 安樂影片
#OnlyTheRiversFlows#河邊的錯誤#EdkoFilms#安樂影片#FILMS#MOVIES#CINEMA#COMINGSOON#STiLLS#POSTER#TRAILERChung Dha#海報#預告#電影簡介#劇照
記得follow我哋嘅
Instagram @chairmen.hk @alanleung2
www.instagram.com/chairmen.hk
www.instagram.com/alanleung2
YouTube #Subscribe
www.youtube.com/@chairmenhk/
Facebook Chairmen.hk – 吹咩
www.facebook.com/chairmenhk
Facebook 吹咩不專業影評
www.facebook.com/UnprofessionalFilmReview
Also can sponsor us by PayMe
https://payme.hsbc/alanleung2
Website
www.chairmen.hk
