记得大约系喺九六至到九八年左右，一放学就即刻跑返屋企去睇『特种变形勇士』。
特种变形勇士系讲一班外星人因为太空船出现问题，而要急降到一个星球嘅故事。班外星人急降咗个星球之后，佢哋发现如果唔同当地嘅生物合体同化，佢哋可能就会有生命危险，就因为咁有啲外星人就同生物合体变咗恐龙，有啲外星人就变咗其他嘅史前猛兽，例如有猩猩、有老鼠、有鹰、有暴龙速龙、又有蜘蛛，北极虎等等。
同生物合体同化左嘅外星人，佢哋有时都会变返做机械人嘅样，但唔系成日得，要够能量先得。记得好人𠮶边呢，变身嘅时候就会先叫自己个名，之后就会讲「机动躯体」；要坏人𠮶边呢，变身嘅时候佢哋就会讲自己个名之后就会讲「魔体重现」。就好似奥狄武「机动躯体」又或者狄龙堡「魔体重现」咁样。之后两班人就喺个星球上面战斗，为咗要争𠮶个星球上面嘅某一啲资源，然后补充飞船嘅原料再次返番上太空之类。
因为都成廿几年前嘅事啦！中途呢，我都有问过一啲朋友有冇睇过呢一套嘅3D动画。有啲人直头就冇睇过，唔知系啲乜，又有啲人话睇过仲话系变形金刚前传嚟㗎。其实咁耐以来都唔系好多人讨论过又或者揾过一个真正嘅答案关于特种变成勇士究竟系乜离，所以大家就当佢系变形金刚嘅前传啦，其实都只不过系一个猜测。
喺2023年嘅6月，变形金刚就出咗一集新嘅电影就叫做『变形金刚：狂兽崛起』。而poster上面呢就出现咗一啲疑似特种变形勇士样嘅野兽机械人。 我好开心，因为「马高斯」请埋我一齐去睇首映！
咁喺电影入边呢，其实就讲咗好多关于特种变形勇士嘅情节㖞！最正嘅呢就系，电影入边嘅野兽机械人啲名直头就系特种变形勇士入边主角嘅角色添！ 例如有奥狄武、捷达、飞罗刹等等⋯⋯我睇到之后真系好开心，好有回忆感。好似填补咗我对童年嘅时候睇特种变形勇士嘅一啲空隙，又或者一啲未知情嘅答案，亦都同时解答咗，朋友咁多年来猜测 特种变形勇士 同 变形金刚 之间嘅关系，所以睇完之后真系好感触，童年回忆都返晒嚟！
虽然今集变形金刚电影入边嘅特种变形勇士背景有少少唔同咗，但系整体上可以连接到特种变形勇士动画喺狄龙堡死咗之后嘅故事，所以都算系一个完整接到轨嘅剧本。但最可惜嘅就系我钟意嘅几个角色竟然冇出现到，就好似老鼠仔伟卓同埋北极虎泰加顿等等。
虽然冇咗我钟意嘅𠮶两个主要角色，但整体上两个故事能够合得埋，两个时代嘅主角都可以同时出现，呢样嘢已经令我好心满意足啦！
所以各位特种变形勇士迷，记得一定要睇 『变形金刚：狂兽崛起』，可能第日仲会有更加多惊喜呢！？！ 同时未睇过特种变形勇士嘅朋友，记得返去煲剧啦！
#变形金刚 #变形金刚狂兽崛起 #TransformersRiseoftheBeasts #Transformers #博派 #柯柏文 #Optimus #大黄蜂 #奥狄武 #Optimus #BeastWars #BeastWarsTransformers #孩之宝 #捷达 #赖奴 #飞罗刹 #GIJoe
===== ===== ===== ===== =====
记得follow我哋嘅
Instagram @chairmen.hk @alanleung2
www.instagram.com/chairmen.hk
www.instagram.com/alanleung2
YouTube #Subscribe
www.youtube.com/@chairmenhk/
Facebook Chairmen.hk – 吹咩
www.facebook.com/chairmenhk
Website
www.chairmen.hk
