記得大約係喺九六至到九八年左右，一放學就即刻跑返屋企去睇『特種變形勇士』。
特種變形勇士係講一班外星人因為太空船出現問題，而要急降到一個星球嘅故事。班外星人急降咗個星球之後，佢哋發現如果唔同當地嘅生物合體同化，佢哋可能就會有生命危險，就因為咁有啲外星人就同生物合體變咗恐龍，有啲外星人就變咗其他嘅史前猛獸，例如有猩猩、有老鼠、有鷹、有暴龍速龍、又有蜘蛛，北極虎等等。
同生物合體同化左嘅外星人，佢哋有時都會變返做機械人嘅樣，但唔係成日得，要夠能量先得。記得好人嗰邊呢，變身嘅時候就會先叫自己個名，之後就會講「機動軀體」；要壞人嗰邊呢，變身嘅時候佢哋就會講自己個名之後就會講「魔體重現」。就好似奧狄武「機動軀體」又或者狄龍堡「魔體重現」咁樣。之後兩班人就喺個星球上面戰鬥，為咗要爭嗰個星球上面嘅某一啲資源，然後補充飛船嘅原料再次返番上太空之類。
因為都成廿幾年前嘅事啦！中途呢，我都有問過一啲朋友有冇睇過呢一套嘅3D動畫。有啲人直頭就冇睇過，唔知係啲乜，又有啲人話睇過仲話係變形金剛前傳嚟㗎。其實咁耐以來都唔係好多人討論過又或者搵過一個真正嘅答案關於特種變成勇士究竟係乜離，所以大家就當佢係變形金剛嘅前傳啦，其實都只不過係一個猜測。
喺2023年嘅6月，變形金剛就出咗一集新嘅電影就叫做『變形金剛：狂獸崛起』。而poster上面呢就出現咗一啲疑似特種變形勇士樣嘅野獸機械人。 我好開心，因為「馬高斯」請埋我一齊去睇首映！
咁喺電影入邊呢，其實就講咗好多關於特種變形勇士嘅情節喎！最正嘅呢就係，電影入邊嘅野獸機械人啲名直頭就係特種變形勇士入邊主角嘅角色添！ 例如有奧狄武、捷達、飛羅剎等等⋯⋯我睇到之後真係好開心，好有回憶感。好似填補咗我對童年嘅時候睇特種變形勇士嘅一啲空隙，又或者一啲未知情嘅答案，亦都同時解答咗，朋友咁多年來猜測 特種變形勇士 同 變形金剛 之間嘅關係，所以睇完之後真係好感觸，童年回憶都返晒嚟！
雖然今集變形金剛電影入邊嘅特種變形勇士背景有少少唔同咗，但係整體上可以連接到特種變形勇士動畫喺狄龍堡死咗之後嘅故事，所以都算係一個完整接到軌嘅劇本。但最可惜嘅就係我鍾意嘅幾個角色竟然冇出現到，就好似老鼠仔偉卓同埋北極虎泰加頓等等。
雖然冇咗我鍾意嘅嗰兩個主要角色，但整體上兩個故事能夠合得埋，兩個時代嘅主角都可以同時出現，呢樣嘢已經令我好心滿意足啦！
所以各位特種變形勇士迷，記得一定要睇 『變形金剛：狂獸崛起』，可能第日仲會有更加多驚喜呢！？！ 同時未睇過特種變形勇士嘅朋友，記得返去煲劇啦！
#變形金剛 #變形金剛狂獸崛起 #TransformersRiseoftheBeasts #Transformers #博派 #柯柏文 #Optimus #大黃蜂 #奧狄武 #Optimus #BeastWars #BeastWarsTransformers #孩之寶 #捷達 #賴奴 #飛羅剎 #GIJoe
===== ===== ===== ===== =====
記得follow我哋嘅
Instagram @chairmen.hk @alanleung2
www.instagram.com/chairmen.hk
www.instagram.com/alanleung2
YouTube #Subscribe
www.youtube.com/@chairmenhk/
Facebook Chairmen.hk – 吹咩
www.facebook.com/chairmenhk
Website
www.chairmen.hk
