《4拍4家族》優先場
#吹咩不專業影評 #不專業影評 #觀後感 by Alan Leung 2
《Sing Street》、《METAL LORDS》、《NANA》《BECK》、《海角七號》呢啲都係我鍾意嘅音樂電影；難得香港拍出咗一套關於玩音樂嘅電影《4拍4家族》，鍾意音樂嘅大家當然就要支持支持啦！
入場之前，千祈唔好被《4拍4家族》嘅電影poster誤導咗！以為係好似 《低一點的天空》style 嘅電影，其實《4拍4家族》係一套超級好睇嘅親情加音樂電影嚟㗎！電影入邊唔單止有神童鼓手、音樂女神、神級樂與恕前輩、文青創作歌手，仲有好多好多香港地上地下嘅音樂人、舞者、藝術家同創作人參與演出。劇情有悲亦有喜，無冷塲，每個角色都可能令你感同身受。
今次電影優先場完場嘅時候，咁啱導演賴恩慈到場謝票，仲同大家分享咗一啲拍攝感受！原來《4拍4家族》用咗八年時間去籌備同拍攝，最難嘅一件事就係要搵到適合嘅演員。導演話選角選咗好耐，都搵唔到一個打鼓可以打到出神入化嘅小朋友，本身諗住放棄呢一個角色嘅戲份，直到「陳諾霆」小朋友嘅出現，令到電影搵個到新嘅希望！ 原來 陳諾霆 小朋友 係 泰迪羅賓 隊Band 「Teddy Robin and the Playboys」鼓手嘅孫仔，一切好似係巧合，但更有可能係天意啦！
電影裏面提及一隊Band就好似一家人；但一家人組埋一隊Band，會唔會就好似「corrs」咁呢？ 夾Band 始終都會有散嘅一日，但一家人又會唔會散呀？
導演賴恩慈話《4拍4家族》冇參加任何嘅電影節！所以希望鍾意音樂嘅你、鍾意香港音樂嘅你，帶埋親戚朋友姨媽姑姐叔伯兄弟，一齊去撐呢套港產嘅親情音樂電影啦！
「有一日我可能唔記得晒所有嘢，但你哋都一定要繼續行落去；當有一日你可能唔記得我哋，但最緊要嘅係我哋記得你。」
詩詞歌賦本身唔係就係咁嘅咩？
最緊要係有識得欣賞嘅人！
而每個人都有一條唔同嘅音樂路。
官方資料:
《4拍4家族》故事講述決心踏上國際舞台的Band Four 主音Cat (謝安琪 飾)自小崇拜結他手父親家勁，King (泰迪羅賓 飾)，父親卻在她十歲時離家出走。廿多年後，Cat 媽病逝，父女在火葬場內重逢，此時，Cat多了9歲兒子Riley(陳諾霆 飾)，家勁攜帶了女兒樂弦(Anna hisbbuR 飾)回來。四人忽然同一屋簷下，一個家四種聲音，各有掙扎、秘密與恐懼，難以溝通。音樂是四人唯一的共通點，當透過音樂四人開始合拍互相聆聽時，Band Four 卻面臨更大難關 ⋯⋯
《4拍4家族》電影主題曲
《毋忘 “If I don’t remember”》MV登場
謝安琪對戲中親情訊息感共鳴
驚嘆10歲「兒子」Rondi
演活荒廢學業天才鼓手
由賴恩慈執導﹐謝安琪（Kay）、泰迪羅賓（Teddy Robin）、Anna hisbbuR，以及陳諾霆（Rondi）領銜主演的溫情電影《4拍4家族》，將於10月19日上畫。今日（26／9）發布六位人物角色海報，以及謝安琪主唱的電影主題曲《毋忘 “If I don’t remember”》MV，歌曲由電影音樂總監戴偉作曲，梁栢堅填詞，歌詞以記憶為主題，詮釋Kay飾演的主角Cat患病之後，終於悟出家人和知音人的可貴，戲中Cat跟3位家庭成員之間各有不同問題，但隨著4 人組成Band Four樂隊﹐箇中的掙扎、不和最後都因音樂而化解。Kay非常喜歡戲中的親情訊息，並相信觀眾都會好有共鳴「我想做人做到一定年紀，都總會試過跟家庭成員有些事情是解決不到，抑或互相理解不到，所以我都有很多真實的感情可以投射在角色裡面。」
Kay對於Cat跟3位家庭成員之間的關係都深有感受。戲中她的兒子Riley(陳諾霆 飾)因沉迷打鼓而荒廢學業，現實中作為兩孩之母的Kay，都很明白Cat的內心掙扎。「一個家長面對著一個這麼有音樂天分的人，但是他學業是不行的，那怎麼取捨呢？點樣栽培他呢？這些都是很真實的事情，我對於這些個題材很有感覺的，就是怎麼為之一個好的家長，是走一條人人都走的路，還是你看準你的小朋友長處呢。」值得一提，飾演Riley的Rondi，今年10歲的他本身來自音樂世家，6歲經已上過紅館為古巨基伴奏，亦有份參與ViuTV打鼓真人騷《擊戰》，Kay對於這個天才兒子的欣賞之情，溢於言表「Rondi是一個世界級的音樂天才﹗是一個好有趣嘅小朋友，由於我自己本身好鍾意同小朋友相處，我哋幾乎無任何的磨合期，一來到就已經好能夠互相溝通，仲有在片場互相照顧。」
至於戲中Kay同父異母的妹妹樂弦，就是由2020年出道的新晉獨立音樂人Anna hisbbuR所飾演，Kay透露開拍前已經有留意Anna的作品，並以為對方性格冷酷，然而片場相處日子愈久，Kay對Anna印象都有改變。「我哋等埋位時候一有機會就傾計，睇下對方鍾意乜嘢音樂，或者有演出嘅時候攞出嚟講，識多咗之後我哋，好自然咁產生了感情，我亦好錫佢，我覺得而家對住Anna有一種，真係我妹妹嘅感覺。」戲中二人從互相不信任對方，到逐步解開心中介蒂，Kay就指當中關係變化自然動人。
Teddy在戲中飾演兩姊妹的父親家勁，家勁在女兒Cat小時候，經已離家出走，直至Cat母親離世才回港，Cat開初對家勁欲修補關係並不領情，但因為音樂這對不和父女的關係逐漸緩解。現實中，Kay跟丈夫張繼聰都是歌手，自然對於戲中用音樂連繫家庭很有同感。「一家人如果有一個共同的話題，同樣喜歡的喜好，那一定會感情更好，這部電影裡面其實四個角色都是有音樂天分的人，其實這點是很難得的，亦因為這樣，音樂是他們之間產生特別的連繫，從而修補他們之間的關係。導演將音樂同家庭兩個元素連繫一齊，呈現出來是很舒服和自然。」
在MV中見到Band Four上台演出主題曲，Kay回想拍攝這一幕的時候，現場藝穗會有好多音樂人，大家就即場把握機會夾Band「我們現場是有真玩的，還未埋位之前，Rondi玩得最多，Teddy 也是會偶爾跟 Rondi，Free Style即場夾歌，很多幕前的都是音樂人，我們幕後也有很多共同話題。」除了以上幾位之外，電影亦邀請一眾音樂人演出及客串，包括張進翹、Jan Curious、DJ黃志淙、樂隊Nowhere Boys及The Hertz、鼓手蘇耀銘及吳卓曦，另外蔡紫晴、章尾而及劉君冬就飾演Cat的前Band Four成員，而本身是組合朱凌凌成員的朱栢謙，就飾演醫生，至於陳奐仁就演表演場地Fridge Bar老闆，幾位都有在戲中表演樂器，樂聲貫穿整部電影。
官方都送咗電影海報Softcopy俾大家download
《4拍4家族》
出品： #天下一電影製作有限公司、 #無限動力實業有限公司
聯合出品： #一毛製作有限公司、 #本地製作有限公司
電影獲 #香港電影發展基金 及 #創意香港 支持拍攝
監製： #泰迪羅賓、 #廖婉虹
導演： #賴恩慈
演員： #謝安琪、 #泰迪羅賓、 #AnnahisbbuR、 #陳諾霆、 #陳奐仁、 #蔡紫晴、 #張進翹、 #朱栢謙、 #朱柏熹
電影 4拍4家族Band Four
#4拍4家族#BandFour#MOVIES#FILMS#MUSIC#COMINGSOON#MOVIESSTILL#POSTER#TRAILER
記得follow我哋嘅
Instagram @chairmen.hk @alanleung2
www.instagram.com/chairmen.hk
www.instagram.com/alanleung2
YouTube #Subscribe
www.youtube.com/@chairmenhk/
Facebook Chairmen.hk – 吹咩
www.facebook.com/chairmenhk
Also can sponsor us by PayMe
https://payme.hsbc/alanleung2
Website
www.chairmen.hk
