【#咩FILMS】【#咩電影】【#咩MOVIES】
【吹咩不專業影評】
《驅魔人:信仰者》“The Exorcist: Believer” VIP Screening
#吹咩不專業影評 #不專業影評 #觀後感 by Alan Leung 2
睇《驅魔人：信仰者》之前 我睇咗 《驅魔人》導演剪輯加長版，因為我自己都想了解多啲 《驅魔人》究竟係講啲乜嘢。話晒都係經典嘅電影作品，點都要清楚了解多啲，先知道後者有咩分別之處。首先當然係要多謝一直支持我寫觀後感同成日邀請我去睇戲嘅Windy&Man。講真！因為你哋，我先開始寫返好多嘢！
《驅魔人：信仰者》同埋《驅魔人》其實真係有好多相似嘅地方，最緊要嘅就係第一集嘅母女角色都會喺最新嘅呢一集出現。不過《驅魔人：信仰者》比起《驅魔人》嘅片長感覺上係短咗啲啲，而且《驅魔人：信仰者》喺驅魔儀式上面明顯地係俾《驅魔人》多咗好多。
《驅魔人：信仰者》同《驅魔人》嘅唔同之處，就係少咗好多用紀錄片或者蒙太奇方式去表達惡魔嘅形象！相反惡魔嘅影像呈現多咗喺被惡魔附身嘅小女孩身上邊。再加上，被附身嘅唔單只係一個人，同時間驅魔嘅人嘅人數都比以前增加咗好多。
驅魔人唔再係單單，關於某一個宗教。而係關乎同一個信仰分支出嚟嘅唔同教系。唔同嘅教系、唔同嘅方法，同一樣嘅經文、同一樣嘅信念。好多分支派系，佢哋嘅信仰者都覺得自己有愧於教會所以先至離開原本的宗教，但其實佢哋本身對主嘅恩典及信仰係好強烈同埋好忠心。相反喺傳統宗教入邊，確實係有太多人定立嘅規矩、權力、地位，要做一件事要幫一個人，就好似一個政府咁樣，要交俾唔同嘅部門去審批，但講到驅魔呢，meeting完之後，就會因為呢樣嗰樣最終叫你放棄⋯⋯喺第一集驅魔人其實都出現同樣嘅情況，因為教延唔想你咁樣做，如果你要做炸兩，所有嘢你就要自己孭上身。
喺唔同嘅驅魔人電影，其實所做嘅驅魔儀式，無論係乜嘢派系都好，都好似只不過係抵制緊嗰隻惡魔嘅力量，事實上好似完全冇驅走過佢。睇返第一集，唔同嘅神父喺驅魔儀式入邊，惡魔都只不過係覺得你同佢玩緊遊戲。去到最新呢集嘅《驅魔人：信仰者》其實惡魔直頭就係同你講緊，佢係同你哋玩緊，永遠玩緊嘅都係『選擇遊戲』。
喺第一集驅魔人，兼任神父嘅考古學家喺古蹟入邊發現到一啲銀製嘅maybe驅魔物品；而發掘到物品嘅地方，就剛剛對着一個恐怖文明雕塑。恐怖文明雕塑喺第一集驅魔人嘅結尾，當神父驅魔接近失敗嘅時候，雕塑就發光咁恐怖地出現喺神父嘅面前，神父竟然用「等價交換」去將附身係小女孩嘅惡魔引導到佢自己身體入邊，再自己跳樓自殺，用自己嘅身體綁定惡魔之後「同歸於盡」⋯⋯ 究竟恐怖文明雕塑係神定係鬼真係冇人知，但細心諗吓，古文明點解要創造出惡魔雕塑呢？神魔本身就係同體？
去到最新一集《驅魔人：信仰者》，所有幫手驅魔嘅人士，佢哋都會攞住第一集相同嘅銀製驅魔吊墜⋯⋯究竟係咪真係有用？⋯⋯所有嘅驅魔人，都用盡佢嘅自家嘅法寶、驅魔方法、驅魔經文去嘗試驅魔，對被附身嘅小女孩們，確實係有啲舒緩嘅情況，但實質上對驅魔係毫無用處。喺《驅魔人：信仰者》入邊，佢哋成日都提及到，係驅魔嘅時候千祈唔好觸碰被附身嘅人，因為你有可能都會被嗰啲能量影響到。 當各家各法各門各派出盡法寶嘅時候，成功咗少少但確實真係冇乜用途。當大家面臨失望之際，大家就喺度諗究竟係咪大家唔夠團結同埋信念唔夠呢？⋯⋯就係呢一刻，教廷reject佢驅魔嘅神父突然唔知因為乜嘢神明上身咁，懶型咁樣走去兩個附身小女孩嘅身邊；雙手按住兩位小女孩之後就自己做炸兩去驅魔，睇落隻惡魔好似好驚，但其實佢笑笑口咁樣用力量吸住咗炸兩神父嘅身體，之後炸兩神父就變咗第一集嘅附身少女一樣，個頭180度咁樣俾力量扭轉咗，好似唔係180度係直頭360度+180度，就係咁炸兩神父當場死亡⋯⋯都話咗唔好掂到佢㗎喇！
炸兩神父死咗之後，惡魔就同大家講，我而家俾選擇你哋，你哋二揀一睇吓邊個女仔要死啦！ 講返兩個女仔先，一個就係傳統教會家庭長大嘅白人有錢少女，而另外一個就係冇咗媽媽單親家庭長大亦冇宗教信仰嘅黑人少女。
惡魔同驅魔人們講二揀一，講真點會冇私心啊，所以話信念大於一切！全場嘅人竟然突然間話唔揀，因為兩個都要救！ 咁惡魔啊，就當然會係整吓個女仔呀，嚇下啲驅魔人呀，嚇下啲家長啊！迫你選擇啦！最終當然就有人私心咗，之後一個女仔就死咗啦⋯⋯想知係乜喺買飛去睇啦！
講返第一集嘅女主角！係最新嘅一集真係有出現㗎！喺《驅魔人：信仰者》少女們被附身之後，其實同第一集嘅事件好相似，啲老竇老母梗係四圍搵醫生去醫佢哋個女啦！當然就唔會有人相信係惡魔附身，一定就係話精神病咩怪病之類！所以第一集嘅女主角就正正係最好嘅機會出現啦！因為佢相信、因為佢經歷過、同埋佢用咗50年去搜集唔同嘅資料、究竟咩係惡魔同埋點樣驅魔？⋯⋯ 但相信又點呀？ 50年嚟佢個女都唔信佢(即係本身被上身嗰個呀)！
唔好講話驅魔人嘅故事係想推翻某啲宗教！反而佢係想我哋去反思返真實信仰嘅能力係有幾大！有幾多人真心係去相信，又有幾多人係自私自利嘅星期日信徒呢？喺好多驅魔電影入邊，喺驅魔儀式都會用方法迫惡魔講出佢嘅名字，之後進行唔同方式驅魔⋯⋯但係喺《驅魔人》電影系列入邊，佢哋嘅惡魔係冇名字，惡魔會同你講佢唔怕你相信緊嘅嗰啲嘢，因為佢就係惡魔！
睇返《驅魔人》同《驅魔人：信仰者》究竟惡魔係點嚟嘅呢？第一集嘅時候，小女孩主角話俾媽咪聽佢玩嗰啲好似碟仙咁樣嘅遊戲；而喺信仰者入邊，兩個附身嘅小女孩亦都嘗試緊一啲疑似嘅通靈遊戲⋯⋯《驅魔人》電影系列好似話緊俾我哋聽，千祈唔好嘗試任何有機會接觸惡魔嘅所有通靈遊戲，因為當你玩咗呢個選擇遊戲，你亦都會被同樣進入咗被選擇遊戲入邊。當你進入咗被選擇遊戲之後，其實你睇返電影入邊，惡魔就會一直開始同你玩，控制你嘅身體，甚至得到超人嘅力量！其實，惡魔係甚少會搞被附身者身體以外人，但係唔知點解得到咗力量被附身嘅人，外邊嘅人都永遠睇佢哋唔順眼，覺得佢哋係怪物，成日講粗口！之後嗰班睇唔順眼嘅人就會開始變成驅魔炸兩！
所以大家要知道、明白、同埋記住！千祈唔好玩嗰啲通靈遊戲，又或者嘗試同惡魔接觸。同時大家要記得，如果你身邊嗰啲人成日講粗口，好似得到咗某啲力量，最好你就遠離佢哋少少，千祈唔好諗住幫佢哋，同埋千祈唔好同佢哋有身體接觸，更唔好諗自己成為一個驅魔炸兩！因為你唔搞隻惡魔，隻嘢就唔會搞你⋯⋯
到最後講返呢套電影真係好恐怖！問咗10個睇過呢套電影嘅人，竟然10個都俾同一樣嘢嚇親，就係條「蛇」而並唔係任何被附身少女嘅特技化妝⋯⋯ 都話「蛇」本身就係惡魔嘅化身㗎喇！ 講返我寫呢一篇觀後感，都寫咗好長時間，因為寫咗好幾次，個save都唔見咗、又或者唔見咗一半、又或者變返上次嗰集驅魔人寫嘅嘢！總之，好似佢唔係咁想比我出咁啦！ 係咪真係咁堅？你買飛睇吓咪知囉！記住啦『信者可能失救㗎！』
官方資料:
《驅魔人:信仰者》“The Exorcist: Believer”
10月12日 信者失救
50年前的秋天，史上最震撼驚典片王《驅魔人》(The Exorcist) 大銀幕上誕生，震懾全球。2023年10月，環球影業、BLUMHOUSE 製作公司暨導演大衛哥頓格連，一承正宗IP的詭異神髓，推出了 《驅魔人：信仰者》(The Exorcist: Believer)，打開全新恐怖風貌！
12年前，Victor懷孕的妻子在海地地震中去世，他獨自撫養女兒Angela。Angela和朋友Katherine一次意外消失在樹林裡，三天後回來時徹底失憶，並引爆了一連串解釋不到的神秘事件，迫使Victor面對邪惡最極點。在恐懼和絕望中，他唯一可以做的，是找出唯一目睹過類似事情而活著的人—— Chris MacNeil。Chris 正是原裝《驅魔人》女主角，她的女兒Regan五年前發生過不可思議遭遇，令Chris徹底改變了自己⋯⋯
改編 William Peter Blatty 暢銷小說的驚典《驅魔人》自1973年上映後，永恆地改變了光影世界的驚嚇文化。當年不單打破票房記錄，更獲得十項奧斯卡提名，並成為史上首部獲得最佳影片提名的恐怖電影。金像得主愛倫貝絲蓮 (Ellen Burstyn) 當年飾演 Chris MacNeil 這個標誌性角色，今日更難能可貴地在此新作中粉墨登場，對影迷而言實在雀躍萬分。
官方都送咗電影海報Softcopy俾大家download
《驅魔人:信仰者》“The Exorcist: Believer”
上映日期： 2023年10月12日（四）
導演： #大衛哥頓格連
演員： #小萊斯利奧多姆、 #安道得、 #珍妮弗奈特勒斯、 #諾伯特李奧巴茨、 #莉婭朱伊特、 #奧莉薇亞瑪肯姆 、 #愛倫貝絲蓮
片種：恐怖
語言：英語
片長：1小時51分
級別：IIB 級
電影預告： https://youtu.be/aWBH6dvRW38
發行： #環球影業 (香港) 有限公司
#驅魔人信仰者#TheExorcistBeliever#驅魔人#TheExorcist#MOVIES#FILMS#COMINGSOON
記得follow我哋嘅
Instagram @chairmen.hk @alanleung2
www.instagram.com/chairmen.hk
www.instagram.com/alanleung2
YouTube #Subscribe
www.youtube.com/@chairmenhk/
Facebook Chairmen.hk – 吹咩
www.facebook.com/chairmenhk
Facebook 吹咩不專業影評
www.facebook.com/UnprofessionalFilmReview
Also can sponsor us by PayMe
https://payme.hsbc/alanleung2
Website
www.chairmen.hk
