【#咩期流行】【#咩RESTURAN】【#咩FOOD】【#咩TASTE】【#咩STYLE】【#咩LIVING】
全新「生记饭店」品味米芝莲级广东菜 – 《吃出「生」命力》
2024年3月7日《香港澳门米芝莲指南 2024》推介,全新「生记饭店」入选 香港新食肆推介之一,点解系新食肆,听讲搬咗新地址就当新店,但计埋旧址入选记录,「生记饭店」已经第十二年攞到米芝莲推介啦!真系坚抽得㖞!
虽然生记饭店创立于1976年,经典广东美食非常出名,听闻卖相唔花巧,又唔用啲乜豪华食材,讲究嘅系扎实嘅烹煮技巧,但系笔者因为细嘅过𠮶阵时「新界九龙仔」唔过海嘅关系,所以一次都未食过;家阵到「大过仔」大乡里出城,终于有机去食一次(朋友带路)。
未去之前睇过吓有啲乜菜式,鸡油蒸原条马友、天下第一招(干煎虎皮椒)、家乡钵仔焗鱼肠、上汤虾子扒柚皮、姜葱桶蠔、云腿茸咸鱼仔蒸胜瓜、上汤枸杞浸厚切猪润、泥鯭粥、家传手磨生煎莲藕饼、蜑家鱼仔海鲜汤、仲有白糖糕⋯⋯等等
我自己好想试嘅呢就系 「上汤枸杞浸厚切猪润」、「上汤虾子扒柚皮」同埋「白糖糕」,因为我细过嘅饮食日记同埋记忆入面,哩几道食物系我食得最多次同埋有最多「反差、对比、同埋两极比较」嘅记忆喺我个脑海入面。唔知米芝莲推介级嘅广东菜,又会系一番乜嘢风味呢?
好啦!未食嘢前先饮酒,开一开胃口。曹生今次喺阿Dick度带咗支「大冠SPARKLING」嚟俾大家试吓!原来哩支「大冠SPARKLING」早就喺我「 #半透明人间 」摄影展出现过,但由于𠮶晚展览Opening Party我要招呼成二百几三百个朋友,到我想攞杯嚟饮,啲Sparkling就已经俾人饮清光,所以我又变成一个未试过「大冠SPARKLING」嘅新手。
讲返啲「 #大冠SPARKLING 」官方资料先:
太冠酒造创业于明治10年,持续了140多年的酒造,位置在山梨县南阿尔卑斯市,水质好、空气干净、环境也适合酿酒。
为了制作年轻人都喜欢喝的日本清酒,大泽社长最早在山梨县试用「葡萄酒酵母」制作日本清酒,像白葡萄酒一样的风味,碳酸系清酒成为很畅销的气泡酒。
在酿造过程中,当清酒还存留着甜味时装瓶,酿造方式与瓶中进行二次发酵的香槟相同。酵母使用的是葡萄酒酵母,但其他都是和日本清酒一样的材料,所以可以充分感受到大米的风味和浓香,还有像白葡萄酒一样的风味,口感甜甜香香兼有清酒爽薰醇熟之美。
香港总代理:
Chigonoiwa House 千古乃岩屋
Dick:9196 5230
「大冠SPARKLING」HKD$200-350 想买就自己揾代理买!
我自己就觉得「大冠SPARKLING」同传统清酒好唔同,真系似SPARKLING wine多过Sake,但finishing仲系带有米香。入口香甜,非常易饮,似果香汽水,但大家记得唔好饮太急,因为系酒嚟架,易醉嘅朋友 就要留意啦!
终于都嚟到食物嘅部分,因为朋友带路,每次都系佢哋点菜,嚟啲乜我就食啲乜,唔知佢哋点嘅又系咪我心水呢?
第一道菜「 #即烧BB猪 」
等我试吓同平日啲 烧乳猪 有乜唔同先!
「即烧BB猪」入口「香、臊、松、脆」,烧烤嘅香、乳味嘅臊、肉松化嘅松、脆皮嘅爽脆。我觉得比大部份酒楼或婚礼酒席嘅 烧乳猪 好食,好食在「臊」而不臭,「松」而不硬!但香不够远,脆不够化,仲可以有进步嘅空间。 有啲朋友怕「臊」,我试过点甜酱就可以癖咗阵「臊」味!但就无咗原味RAW烧嘅感觉!
叉烧系超级厚切,听闻系用靓梅头肉嚟烧,肥瘦适中,啖啖肉,我食得一旧,其实我想食多旧⋯⋯因为肉汁油香加上蜜汁,松软而不腻。「蜜汁蠔油豆」我就无试到,旁边嘅几位朋友仔就食到唔停口,几下就食晒啦!
第三道菜「 #生记招牌古法盐焗鸡 」
《香港澳门米芝莲指南2024》中10度评审员最爱嘅菜式之一。制作盐焗鸡特选三黄鸡,肉质「油、香、滑」,咸味啱啱好,唔错唔错!唔太食有骨食物嘅我,都食咗几旧!
第四道菜「 #怀旧虾多士 」
我真系谂唔到有虾多士食!虾多士系我饮食字典当中其中一种好有「情感」嘅食物之一。点解咁讲?因为「 #虾多士 」系我细个𠮶阵时,喺英国唐人餐馆TakeAway Menu上第一次见到,同埋学识嘅名字。我再之前嘅世界,系无「虾多士」哩样嘢存在过!由于喺餐馆好少人Order,所以喺我心目中有着一种神祕或者神圣嘅地位!好记得第一次舅父炸虾多士俾我食,系三角形嘅,食落口嘅感觉系「油香、松脆、弹牙」好特别嘅感觉!
讲返生记嘅「怀旧虾多士」好大旧,长方形厚厚嘅,虾同包嘅比例系二比一,所谓虾多过多士,真系似卖大包,再配上外层包住嘅芝麻粒,「肉质鲜嫩弹牙、多士松脆可口」,朋友们都赞不绝口,确实好味!
可惜𠮶一种「情怀」唔系我嘅回忆,唔系𠮶一种神圣「多士」嘅地位!我自己始终喜欢 虾与包嘅比例系一比一, 可以嘅话 一比二 更好,三角形,似咖喱角咁样嘅小食,正所谓「穷人恩物」,size细啲,数量多返少少,就似返一啲英式 snack 嘅感觉。唔好问我点解?你谂吓「食神」入边「黯然销魂饭」系乜嘢感觉。你!可能先会明。
第五道菜「 #豉蒜凉瓜炆海鱼 」
雷公凿 加上 油斑,先将斑炸咗 锁住肉汁鲜香, 再之后同凉瓜一齐炆。又系咁!唔太喜欢食有骨食物嘅我,都要试一试!凉瓜非常入味,清凉微苦,仲好爽脆,斑肉超嫩弹呀。话咁快!又俾朋友仔们食晒,正呀(佢哋话)!
第六道菜「 #家传手磨生煎莲藕饼 」
谂起细过太婆整煎藕饼我食,𠮶阵时系煎鱼饼咁煎!生记嘅又会系点呢?眼见金黄色嘅莲藕饼,温度、鲜味、香脆嘅感觉,突然间真系感受到一点情怀,我唔太识用文字去形容,对唔住大家!真系要亲身嚟食先至明白。
第七道菜「 #姜葱咸肉丝蒸一夜乾马友 」
#马友#一夜情!真系好入味,再加上姜葱蒸,正上加正!鱼肉超级鲜嫩,但对于我嚟讲确实太多骨啦!咸肉丝嘅味将马友咸香带到另一层次,但得意嘅系马友越嚟越好食,肉丝变成配角,甚至变成伴碟装饰,超大对比。
第八道菜 「 #上汤枸杞浸厚切猪润 」
我期待嘅主角终于上场!厚切猪膶用上汤浸熟,哗!不得了!猪膶有几厚切法,我话你知同影埋俾你哋睇,仲厚过厚切餐肉;当你谂住入面系带一点粉红色,咁先至滑,错啦!我话你知感觉完全相反!厚切猪膶一咬落去,就好似你食脆皮肠咁样 ,层外衣噗一声咬开,入面啲肝汁油滑无比,睇一睇仲要唔系粉红色,系同外面一样全熟嘅啡色。真系好似食紧 「肝酱」咁样,入口即溶、溶而不腻;一啲都唔韧,咬口全靠𠮶层脆皮咁样嘅衣。真系我人生之中暂时觉得最好食嘅猪润之一!话咁快,一人两旧,大家就食晒,但系其实个汤要唔要饮下呢?无人提,无人讲,下次再有机会食,我一定要饮下啲汤先。
第九道菜「 #砂锅鲍鱼鸡粒焗饭 」
鲍鱼鸡粒焗饭炒饭就食得多,鲍鱼鸡粒焗饭就第一次食,仲要系糯米饭,感觉系几神奇嘅!而且都几好食嘅,比起炒饭湿润一啲,同埋饱肚一啲。
第十道「 #白糖糕 」
白糖糕系一种好虾人嘅食物,点解?因为做得唔好嘅话会有一种酸臭味! 生记嘅「白糖糕」真系好味到飞起,唔单止冇𠮶种酸臭味,仲要系「香甜清新」,入口即溶不特止,仲要有longtasting嘅余韵,真系要好好记住,呢一种好食而仲存在嘅真正「白糖糕」嘅味道!钟意食白糖糕嘅朋友仔,一定要嚟买嚟食!真系食过返寻味。
今日嚟生记食饭真系好开心,除咗因为一班朋友喺埋一齐,最紧要嘅系大部份嘅𩠌菜都真系超级有水准,好味不特止,最紧要抵食,同埋有饭店自己嘅特色风格!食到我一路都好想试嘅「上汤浸猪润」,又食到回忆感嘅「白糖糕」同「虾多士」,仲有「蜜汁叉烧」!希望佢哋嘅水准会一路保持落去!虽然今次食咗好多嘢,但仲未试到「 #上汤虾子扒柚皮 」,咁就要留返下一次再嚟试过啦!
生记饭店Sang Kee Restaurant
地址:湾仔骆克道363号三湘大厦3楼
网址 : https://www.sangkee.com.hk/
预订热线:2575 2236 / 2575 2239
WhatsApp:5111 0276
笔者/Photo by Alan Leungwww.alanleung2.com
Sang Kee Restaurant 生记饭店
#生记饭店#SangKeeRestaurant#粤菜#湾仔骆克道#三湘大厦#米芝莲推介#广东菜 #香港澳门米芝莲指南2024 #FOOD #HKFOOD #FOODIE #HKFOODIE #TasteRuler
记得follow我哋嘅
Instagram @chairmen.hk @alanleung2
www.instagram.com/chairmen.hk
www.instagram.com/alanleung2
YouTube #Subscribe
www.youtube.com/@chairmenhk/
Facebook Chairmen.hk – 吹咩 Taste Ruler
www.facebook.com/chairmenhk
Facebook #吹咩不专业影评
www.facebook.com/UnprofessionalFilmReview
Also can sponsor us by PayMe
https://payme.hsbc/alanleung2
Website
www.chairmen.hk