【#咩期流行】【#咩RESTURAN】【#咩FOOD】【#咩TASTE】【#咩STYLE】【#咩LIVING】
全新「生記飯店」品味米芝蓮級廣東菜 – 《吃出「生」命力》
2024年3月7日《香港澳門米芝蓮指南 2024》推介，全新「生記飯店」入選 香港新食肆推介之一，點解係新食肆，聽講搬咗新地址就當新店，但計埋舊址入選記錄，「生記飯店」已經第十二年攞到米芝蓮推介啦！真係堅抽得喎！
雖然生記飯店創立於1976年，經典廣東美食非常出名，聽聞賣相唔花巧，又唔用啲乜豪華食材，講究嘅係扎實嘅烹煮技巧，但係筆者因為細嘅過嗰陣時「新界九龍仔」唔過海嘅關係，所以一次都未食過；家陣到「大過仔」大鄉里出城，終於有機去食一次(朋友帶路)。
未去之前睇過吓有啲乜菜式，雞油蒸原條馬友、天下第一招（乾煎虎皮椒）、家鄉缽仔焗魚腸、上湯蝦子扒柚皮、薑葱桶蠔、雲腿茸鹹魚仔蒸勝瓜、上湯枸杞浸厚切豬潤、泥鯭粥、家傳手磨生煎蓮藕餅、蜑家魚仔海鮮湯、仲有白糖糕⋯⋯等等
我自己好想試嘅呢就係 「上湯枸杞浸厚切豬潤」、「上湯蝦子扒柚皮」同埋「白糖糕」，因為我細過嘅飲食日記同埋記憶入面，哩幾道食物係我食得最多次同埋有最多「反差、對比、同埋兩極比較」嘅記憶喺我個腦海入面。唔知米芝蓮推介級嘅廣東菜，又會係一番乜嘢風味呢？
好啦！未食嘢前先飲酒，開一開胃口。曹生今次喺阿Dick度帶咗支「大冠SPARKLING」嚟俾大家試吓！原來哩支「大冠SPARKLING」早就喺我「 #半透明人間 」攝影展出現過，但由於嗰晚展覽Opening Party我要招呼成二百幾三百個朋友，到我想攞杯嚟飲，啲Sparkling就已經俾人飲清光，所以我又變成一個未試過「大冠SPARKLING」嘅新手。
講返啲「 #大冠SPARKLING 」官方資料先：
太冠酒造創業於明治10年，持續了140多年的酒造，位置在山梨縣南阿爾卑斯市，水質好、空氣乾淨、環境也適合釀酒。
為了製作年輕人都喜歡喝的日本清酒，大澤社長最早在山梨縣試用「葡萄酒酵母」製作日本清酒，像白葡萄酒一樣的風味，碳酸系清酒成為很暢銷的氣泡酒。
在釀造過程中，當清酒還存留著甜味時裝瓶，釀造方式與瓶中進行二次發酵的香檳相同。酵母使用的是葡萄酒酵母，但其他都是和日本清酒一樣的材料，所以可以充分感受到大米的風味和濃香，還有像白葡萄酒一樣的風味，口感甜甜香香兼有清酒爽薰醇熟之美。
香港總代理：
Chigonoiwa House 千古乃岩屋
Dick：9196 5230
「大冠SPARKLING」HKD$200-350 想買就自己搵代理買！
我自己就覺得「大冠SPARKLING」同傳統清酒好唔同，真係似SPARKLING wine多過Sake，但finishing仲係帶有米香。入口香甜，非常易飲，似果香汽水，但大家記得唔好飲太急，因為係酒嚟架，易醉嘅朋友 就要留意啦！
終於都嚟到食物嘅部分，因為朋友帶路，每次都係佢哋點菜，嚟啲乜我就食啲乜，唔知佢哋點嘅又係咪我心水呢？
第一道菜「 #即燒BB豬 」
等我試吓同平日啲 燒乳豬 有乜唔同先！
「即燒BB豬」入口「香、臊、鬆、脆」，燒烤嘅香、乳味嘅臊、肉鬆化嘅鬆、脆皮嘅爽脆。我覺得比大部份酒樓或婚禮酒席嘅 燒乳豬 好食，好食在「臊」而不臭，「鬆」而不硬！但香不夠遠，脆不夠化，仲可以有進步嘅空間。 有啲朋友怕「臊」，我試過點甜醬就可以癖咗陣「臊」味！但就無咗原味RAW燒嘅感覺！
叉燒係超級厚切，聽聞係用靚梅頭肉嚟燒，肥瘦適中，啖啖肉，我食得一舊，其實我想食多舊⋯⋯因為肉汁油香加上蜜汁，鬆軟而不膩。「蜜汁蠔油豆」我就無試到，旁邊嘅幾位朋友仔就食到唔停口，幾下就食晒啦！
第三道菜「 #生記招牌古法鹽焗雞 」
《香港澳門米芝蓮指南2024》中10度評審員最愛嘅菜式之一。製作鹽焗雞特選三黃雞，肉質「油、香、滑」，鹹味啱啱好，唔錯唔錯！唔太食有骨食物嘅我，都食咗幾舊！
第四道菜「 #懷舊蝦多士 」
我真係諗唔到有蝦多士食！蝦多士係我飲食字典當中其中一種好有「情感」嘅食物之一。點解咁講？因為「 #蝦多士 」係我細個嗰陣時，喺英國唐人餐館TakeAway Menu上第一次見到，同埋學識嘅名字。我再之前嘅世界，係無「蝦多士」哩樣嘢存在過！由於喺餐館好少人Order，所以喺我心目中有著一種神祕或者神聖嘅地位！好記得第一次舅父炸蝦多士俾我食，係三角形嘅，食落口嘅感覺係「油香、鬆脆、彈牙」好特別嘅感覺！
講返生記嘅「懷舊蝦多士」好大舊，長方形厚厚嘅，蝦同包嘅比例係二比一，所謂蝦多過多士，真係似賣大包，再配上外層包住嘅芝麻粒，「肉質鮮嫩彈牙、多士鬆脆可口」，朋友們都讚不絕口，確實好味！
可惜嗰一種「情懷」唔係我嘅回憶，唔係嗰一種神聖「多士」嘅地位！我自己始終喜歡 蝦與包嘅比例係一比一， 可以嘅話 一比二 更好，三角形，似咖喱角咁樣嘅小食，正所謂「窮人恩物」，size細啲，數量多返少少，就似返一啲英式 snack 嘅感覺。唔好問我點解？你諗吓「食神」入邊「黯然銷魂飯」係乜嘢感覺。你！可能先會明。
第五道菜「 #豉蒜涼瓜炆海魚 」
雷公鑿 加上 油斑，先將斑炸咗 鎖住肉汁鮮香， 再之後同涼瓜一齊炆。又係咁！唔太喜歡食有骨食物嘅我，都要試一試！涼瓜非常入味，清涼微苦，仲好爽脆，斑肉超嫩彈呀。話咁快！又俾朋友仔們食晒，正呀(佢哋話)！
第六道菜「 #家傳手磨生煎蓮藕餅 」
諗起細過太婆整煎藕餅我食，嗰陣時係煎魚餅咁煎！生記嘅又會係點呢？眼見金黃色嘅蓮藕餅，溫度、鮮味、香脆嘅感覺，突然間真係感受到一點情懷，我唔太識用文字去形容，對唔住大家！真係要親身嚟食先至明白。
第七道菜「 #薑蔥鹹肉絲蒸一夜乾馬友 」
#馬友#一夜情！真係好入味，再加上薑蔥蒸，正上加正！魚肉超級鮮嫩，但對於我嚟講確實太多骨啦！鹹肉絲嘅味將馬友鹹香帶到另一層次，但得意嘅係馬友越嚟越好食，肉絲變成配角，甚至變成伴碟裝飾，超大對比。
第八道菜 「 #上湯枸杞浸厚切豬潤 」
我期待嘅主角終於上場！厚切豬膶用上湯浸熟，嘩！不得了！豬膶有幾厚切法，我話你知同影埋俾你哋睇，仲厚過厚切餐肉；當你諗住入面係帶一點粉紅色，咁先至滑，錯啦！我話你知感覺完全相反！厚切豬膶一咬落去，就好似你食脆皮腸咁樣 ，層外衣噗一聲咬開，入面啲肝汁油滑無比，睇一睇仲要唔係粉紅色，係同外面一樣全熟嘅啡色。真係好似食緊 「肝醬」咁樣，入口即溶、溶而不膩；一啲都唔韌，咬口全靠嗰層脆皮咁樣嘅衣。真係我人生之中暫時覺得最好食嘅豬潤之一！話咁快，一人兩舊，大家就食晒，但係其實個湯要唔要飲下呢？無人提，無人講，下次再有機會食，我一定要飲下啲湯先。
第九道菜「 #砂鍋鮑魚雞粒焗飯 」
鮑魚雞粒焗飯炒飯就食得多，鮑魚雞粒焗飯就第一次食，仲要係糯米飯，感覺係幾神奇嘅！而且都幾好食嘅，比起炒飯濕潤一啲，同埋飽肚一啲。
第十道「 #白糖糕 」
白糖糕係一種好蝦人嘅食物，點解？因為做得唔好嘅話會有一種酸臭味！ 生記嘅「白糖糕」真係好味到飛起，唔單止冇嗰種酸臭味，仲要係「香甜清新」，入口即溶不特止，仲要有longtasting嘅餘韻，真係要好好記住，呢一種好食而仲存在嘅真正「白糖糕」嘅味道！鍾意食白糖糕嘅朋友仔，一定要嚟買嚟食！真係食過返尋味。
今日嚟生記食飯真係好開心，除咗因為一班朋友喺埋一齊，最緊要嘅係大部份嘅餸菜都真係超級有水準，好味不特止，最緊要抵食，同埋有飯店自己嘅特色風格！食到我一路都好想試嘅「上湯浸豬潤」，又食到回憶感嘅「白糖糕」同「蝦多士」，仲有「蜜汁叉燒」！希望佢哋嘅水準會一路保持落去！雖然今次食咗好多嘢，但仲未試到「 #上湯蝦子扒柚皮 」，咁就要留返下一次再嚟試過啦！
生記飯店Sang Kee Restaurant
地址：灣仔駱克道363號三湘大廈3樓
網址 : https://www.sangkee.com.hk/
預訂熱線：2575 2236 / 2575 2239
WhatsApp：5111 0276
筆者/Photo by Alan Leungwww.alanleung2.com
Sang Kee Restaurant 生記飯店
#生記飯店#SangKeeRestaurant#粵菜#灣仔駱克道#三湘大廈#米芝蓮推介#廣東菜 #香港澳門米芝蓮指南2024 #FOOD #HKFOOD #FOODIE #HKFOODIE #TasteRuler
記得follow我哋嘅
Instagram @chairmen.hk @alanleung2
www.instagram.com/chairmen.hk
www.instagram.com/alanleung2
YouTube #Subscribe
www.youtube.com/@chairmenhk/
Facebook Chairmen.hk – 吹咩 Taste Ruler
www.facebook.com/chairmenhk
Facebook #吹咩不專業影評
www.facebook.com/UnprofessionalFilmReview
Also can sponsor us by PayMe
https://payme.hsbc/alanleung2
Website
www.chairmen.hk
